Болашақ инженерлер бәйгесі: БИЛ шәкірттері халықаралық аренада ел намысын қорғайды

Астанада өткен «Alem Tech Fest 2026» фестивалі мен «Central Asia FIRST Championship» чемпионатында «Білім-Инновация» лицейі (БИЛ) оқушылары жоғары дайындық деңгейін көрсетіп, халықаралық аренаға жолдама алды.
Астанадағы EXPO халықаралық көрме орталығында ұйымдастырылған бұл ауқымды шараға әлемнің 7 елінен, атап айтқанда Қазақстан, Қырғызстан, Өзбекстан, Түркіменстан, Эстония, Вьетнам және Гонконгтан 5 000-нан астам талантты оқушы қатысты.

Биылғы жарыс маусымының тақырыбы «SUBMERGED» (Су асты әлемі) және «Archaeology» (Археология) бағыттарына негізделді. БИЛ оқушылары инженерлік шешімдер мен робототехника арқылы тарихи жәдігерлерді зерттеу және сақтау бойынша өздерінің бірегей жобаларын ұсынды.

Жетістіктер мен жолдамалар
Биылғы AI (Жасанды интеллект) жылында «Білім-Инновация» лицейінің (БИЛ) жас өнертапқыштары әлемнің түкпір-түкпіріне жолдама алып, тарихи жетістікке қол жеткізді:
• АҚШ, Хьюстон (FTC Worlds): Әлемдік финалда ел намысын үш мықты команда қорғайды:
• SANA - Алматы ер БИЛ;
• Celestial - Щучинск IT БИЛ;
• Spark team - Ақтау ер БИЛ.
• Халықаралық квота иелері (FTC Premier):
• BiLOrda - Астана Nurorda;
• Spark team - Ақтау ер БИЛ;
• GAMBIT - Ақтөбе ер БИЛ;
• Mooneye - Атырау ер БИЛ;
• Sipinine - Көкшетау БИЛ.
• Халықаралық квота иелері (FLL Challenge):
• Болгария: Жаңаөзен ер БИЛ, Ақтау ер БИЛ;
• Қытай: Жезқазған ер БИЛ, Павлодар қыз БИЛ, Астана қыз БИЛ, Ақтау ер БИЛ.

Жаслан Мәдиев жастардың инженерлік әлеуетін жоғары бағалап, робототехниканы дамыту — еліміздің цифрлық трансформациясының маңызды бағыты екенін атап өтті. Оның айтуынша, бұл дарынды жастар озық технологияларды өндіріс пен басқару саласына енгізіп, Қазақстанның жаһандық нарықтағы бәсекеге қабілеттілігін арттырады.

Аталмыш шара Оқу-ағарту министрлігі мен «USTEM Robotics» қорының қолдауымен, STEM-білім беру арқылы жүйелі жолға қойылды. Жалпы есеппен 16 үздік командадан тұратын ұлттық құрама жасақталды, олар енді Солтүстік Америка, Еуропа және Оңтүстік-Шығыс Азиядағы халықаралық турнирлерде бақ сынайды.