$ 519.58 € 609.36 ₽ 6.63

БҚО-да Ресеймен шекарадағы 13 мектеп жабылуы мүмкін: Үкімет қандай шешім қабылдамақ?

Абдрахманов Мағжан
08 шілде 2025 11:45 26
БҚО-да Ресеймен шекарадағы 13 мектеп жабылуы мүмкін: Үкімет қандай шешім қабылдамақ? Сурет авторы: uralskweek.kz

Мәжіліс депутаттары Батыс Қазақстан облысындағы шекара маңындағы 13 мектептің жабылу қаупіне алаңдаушылық білдіріп, Премьер-министрдің орынбасары Ермек Көшербаевқа депутаттық сауал жолдаған еді. Олар халық саны аз ауылдарда мектептерді тек стандартқа сүйеніп жабу жергілікті жұртты көшуге итермелейді деп есептейді. Ал бұл ауылдардың толық жойылып кетуіне алып келуі мүмкін.

Депутаттар елімізде соңғы 5 жылда 194 ауыл жабылғанын еске салып, бір ғана нормативпен әр өңірге бірдей талап қою дұрыс емес екенін атап өтті. Шекара маңындағы елдімекендер үшін білім беру ұйымдары желісінің нормативіне өзгеріс енгізуді, яғни оқушы санына қойылатын талапты азайтуды сұрады.

Үкімет жауабы

Премьер-министрдің орынбасары Ермек Көшербаевтың мәліметінше, қазіргі таңда бұл 13 мектеп штаттық режимде жұмыс істеп тұр. Алайда 2025–2026 оқу жылында оқушы санының жетіспеуіне байланысты кейбір мектепті қайта ұйымдастыру (мысалы, жалпы орта мектепті негізгі орта мектепке немесе бастауышқа айналдыру) не мүлде жабу қаупі бар екені расталды.

Оқу-ағарту министрлігі БҚО әкімдігіне аталған мектептерді сақтап қалу және дамыту туралы хат жолдаған. Сонымен қатар министрлік шекаралық аймақтағы мектептерге білім беру ұйымдары желісінің нормативін қолданбау мәселесін қарастырып жатыр.

Қазіргі уақытта бұл мәселе Үкіметтің бақылауында. Билік мектептердің тағдырын шешу үшін жұмыстарды жалғастыратынын хабарлады.

Соңғы жаңалықтар