Биыл Қазақстанның спорт және білім олимпиадаларында көрсеткен нәтижесі қандай?

Парижде өткен жазғы Олимпиада күні кеше өз мәресіне жетті. Спорт сайысында спортшыларымыз көк туымызды желбіретсе, білім сайысында да оқушыларымыз түрлі халықаралық пән олимпиадаларына қатысып, жүлделі орындарды иеленді. Ал осы екі саланың қайсысында жетістігіміз көп? Биыл спортшыларымыз бен оқушыларымыз қандай нәтижеге жетті? 

Спортшыларымыздың Парижде жеткен жетістігі мен оқушыларымыздың беделді халықаралық пән олимпиадаларында көрсеткен нәтижесін салыстырып көрдік.

Төрт жылдықтың басты бәсекесінде ел намысын қорғағаған спортшыларымыз 1 алтын, 3 күміс, 3 қоланы еншілеп, жалпы есепте 43-орынға тұрақтады. Олимпиадаға еліміздің атынан 25 спорт түрінен 78 спортшы қатысты. Дзюдошыларымыз Елдос Сметов (алтын) пен Ғұсман Қырғызбаев (қола), боксшыларымыз Нұрбек Оралбай (күміс) мен Назым Қызайбай (қола), гимнаст Нариман Құрбанов (күміс), палуан Демеу Жадыраев (күміс), нысана көздеуден мергендеріміз Ислам Сәтпаев пен Александр Ле (қола) – барлығы 8 спортшы үздіктер қатарынан табылды. Сонда қатысқандардың ішінде нәтиже көрсеткендердің үлесі – 10,25%.

Халықаралық IChO, IPhO, IBO, IEO, ISPHO, IBMO олимпиадаларына қатысқан оқушыларымыздың бәрі жүлделі орындарға ие болды. Ал IMO-ға қатысқан 6 оқушымыздың бесеуі жеңіс тұғырынан көрінді. 

Сауд Арабиясында өткен химиядан халықаралық IChO олимпиадасында жас химиктеріміз қос алтын, бір күміс және бір қола медаль иеленді.

Ал физиктеріміз Иранда өткен физикадан халықаралық IPhO олимпиадасында төрт күміс және бір қола медаль иеленіп, 100% көрсеткішке қол жеткізді.

Өзіміз ұйымдастырған биологиядан халықаралық IBO олимпиадасында оқушыларымыз 4 қола еншіледі. 

IEO халықаралық экономика олимпиадасында да оқушыларымыз екі күміс және үш қола медаль жеңіп алды.

Математикадан халықаралық IMO олимпиадасында Қазақстан құрамасының қоржыны 3 күміс, 2 қоламен толықты.

ISPhO физикадан халықаралық ғылыми олимпиадада қазақстандық оқушылар екі алтын, екі күміс және бір қола медаль жеңіп алып, 17 қатысушы елдің арасында жалпыкомандалық екінші орынды иеленді.

Математикадан JBMO Балқан олимпиадасында оқушыларымыз 2 алтын, 3 күміс, бір қоланы қанжығасына байлады.

Осылайша халықаралық пән олимпиадаларына қатысқан оқушыларымыздың 97%-ы жүлделі орындарды иеленді. Орын алған 35 оқушының 15-і – "Білім-Инновация" лицей-интернатының, алтауы –Назарбаев Зияткерлік мектептерінің, бесеуі – Республикалық физика-математика мектептерінің оқушылары.

Жүлде алған спортшыларымызға да, оқушыларымызға да мемлекет тарапынан ақшалай сыйақы беріледі. Алтын алған спортшылар 250 мың доллар, күміс иегерлері 150 мың доллар, қола медаль еншілегендер 75 мың доллар алады. Сондай-ақ 4-орынға 30 мың доллар, 5-орынға 10 мың доллар, 6-орын алғанға 5 мың доллар беріледі.

Әлемдік 7 беделді халықаралық олимпиаданың жеңімпаздарына біржолғы сыйақы беріледі. 1-орын алғандар 1500 АЕК (5 538 000 теңге), 2-орын алғандар 1000 АЕК (3 692 000 теңге), 3-орын алғандар 500 АЕК (1 846 000 теңге) көлемінде ақшалай сыйақы алады.