Биыл 3 мыңнан астам мектеп пен балабақша аттестациядан өтеді

Қазақстан Республикасы Оқу-ағарту министрлігінің Білім саласында сапаны қамтамасыз ету комитеті 2025 жылы мемлекеттік аттестациядан өтетін 3025 білім беру ұйымын айқындады.

Биылғы жылдың алғашқы жартысында аумақтық департаменттер 1170 білім беру ұйымында мемлекеттік аттестация жүргізген. Бұл іс-шаралар білім беру процесіндегі мәселелерді анықтауға, сондай-ақ оқу орындарының мемлекеттік стандарттар мен біліктілік талаптарына сәйкестігін тексеруге бағытталған.

Комитет төрағасы Серік Әшіровтің айтуынша, былтырғы жылы да бақылау жұмыстары ауқымды түрде жүргізілген.

«2024 жылы комитет пен оның аумақтық департаменттері 2487 білім беру ұйымында мемлекеттік аттестаттау, профилактикалық бақылау және шағымдар негізіндегі жоспардан тыс тексерулер өткізді. Соның нәтижесінде мұғалімдердің біліктілікті арттыру курстарын уақтылы аяқтамауы, мектептердің материалдық-техникалық базасының талапқа сай болмауы сияқты кемшіліктер анықталды», – деді ол.

Ведомство атап өткендей, мұндай бақылау іс-шаралары білім беру сапасын арттыруға, педагогтердің құқықтарын қорғауға және оқушылардың сапалы білім алуына кепілдік беруге бағытталған.