Балабақшалар мен мектептерге азық-түлікті 500%-ға дейін үстемақымен сатқан

Қазақстандағы 1100-ден астам мемлекеттік мекеме (мектептер, балабақшалар, ауруханалар және балалар үйлері) азық-түлікті негізсіз жоғары бағамен сатып алған. Бұл туралы Қаржылық мониторинг агенттігі хабарлады.

Агенттік 817 жағдайда азық-түлік бағасының қымбаттағанын анықтап, материалдарды өңірлік комиссияларға жолдады. Мемлекеттік сатып алу шарттарын қайта қарау арқылы 685 ұйымның жұмысы оңтайландырылып, 370 миллион теңгеден астам қаражат үнемделді.

Қаржылық мониторинг агенттігі "спекулятивті" схемаларды анықтап, мемлекеттік мекемелердің азық-түлік сатып алуын қадағалауға бағытталған жобаны жүзеге асыруда. Жұмыс тек IT құралдарын пайдалана отырып, мекемелердің қызметіне араласпай жүргізіледі.

Нәтижесінде, 69 тиімсіз делдал қызметі тоқтатылып, 600 әкімшілік хаттама толтырылды. Айыппұлдардан мемлекет қазынасына 11 миллион теңге өндірілді.

Өңірлердегі нәтижелер

• Ақтөбе облысындағы 80 балабақшада қарақұмық, картоп, сәбіз, қант, жұмыртқа және тұз бағасы төмендетілді. Мысалы, кәсіпкер қарақұмықты 500%-дан астам үстеме бағамен жеткізген.
• Қостанайда 117 әлеуметтік мекеме азық-түлікті 180%-ға дейінгі үстеме бағамен сатып алған. Департаменттің араласуынан кейін қосымша келісімдер жасалып, 60 миллион теңге үнемделді.
• Астана мен Қарағанды облысындағы 175 балабақшада 100 миллион теңгеден астам қаражат үнемделді.

Агенттік азық-түлік бағасының негізсіз өсуіне жол бермеу үшін бірқатар шара ұсынды:

1. Мекемелердің азық-түлікті тікелей өндірушілер мен ірі жеткізушілерден сатып алуы.
2. Сауда үстемесінің артуына әкімшілік жауапкершілікті күшейту және заңсыз табысқа тең айыппұл салу.