Аймағамбетов Павлодар мектептерінде сабақ уақытының қысқаруын сынға алды

Жақында Павлодардағы барлық мектепте сабақ уақыты қысқартылғаны белгілі болды. Сабақтар 40 минутқа қысқарды, ал үзіліске кемінде бес минут беріледі. Өңірлік БАҚ мәліметінше, бұл өзгерістер «оқу орындарының толтырылу деңгейіне» байланысты енгізілген. Салдарынан қаладағы №39 мектептің екінші ауысымда оқитын оқушылары сабақтан кешкі 19:30-да бір-ақ қайтатын болды.

Бұл жаңашылдықты Мәжіліс депутаты, бұрынғы Оқу-ағарту министрі Асхат Аймағамбетов сынға алды. Ол жергілікті басқарманың жаңа мектептер салудың орнына қаражат үнемдеу мақсатында осындай қадамға барып отырғанын меңзеді.

"Павлодар облысының басшылары сабақтарды 30 минутқа дейін қысқартуды ойлап таппағанына шүкір! Бұндай логикамен енді жаңа мектептер салмай-ақ, төрт ауысымға көшіп, миллиардтаған қаражатты үнемдеуге болар еді", – деп жазды экс-министр.

Аймағамбетов аймақтардың сабақ ұзақтығын өз бетінше белгілей алуы білім беру жүйесіндегі хаосқа әкелетінін айтты.

"Бағдарламалардың мазмұны, білім мақсаттары өзгермей қалай сабақты қысқартуға болады? Бұл білім сапасына және барлық оқушыларға сапалы білім алу үшін тең жағдай жасауға үлкен проблемалар тудыратыны анық", – деп толықтырды депутат.

Аймағамбетов елімізде біртұтас уақыт белдеуі енгізілген кездегі бұл құбылыстың "парадоксальды сипатын" атап өтті.

"Қызық парадокс: бір жағынан, ел бойынша бірыңғай уақыт белдеуі енгізіліп жатыр, ал екінші жағынан — әр облыс сабақтың ұзақтығын өзі шешеді. Бірізділік қайда? Ғылымға негізделген шешім қайда?" – деді Аймағамбетов.

Бұған дейін қазіргі Оқу-ағарту министрі Ғани Бейсембаев әр мектеп сабақтың қанша уақытқа созылатынын өз бетінше шеше алатынын хабарлаған еді. Бастауыш сыныптарда сабақтар кем дегенде 35 минутқа, ал бесінші сыныптан бастап 40 минутқа дейін созылуы мүмкін.