Аймағамбетов мұғалімдерді келеке еткен оқушылар жазасыз қалмайтынын ескертті

Қазақстандық мектеп мұғалімдеріне қатысты әлеуметтік желілердегі буллинг пен киберқорлау белең алып барады. Соңғы уақытта TikTok платформасында ұстаздардың суреттерін балағат сөздермен және қорлайтын әуендермен өңдеп, жариялайтын арнайы аккаунттар көбейген. Атап айтқанда, Көкшетау қаласындағы мектептердің бірінде оқушылар мұғалімдерді келеке еткен бейнероликтерді жүйелі түрде жариялап, тіпті өзге мектептерден осындай «тапсырыстар» қабылдап келгені анықталды, деп хабарлайды Kursiv.kz.

Бұл мәселеге қатысты ҚР Парламенті Мәжілісінің депутаты Асхат Аймағамбетов ресми мәлімдеме жасады. Ол ұстаздар қауымын мұндай бассыздыққа төзбей, құқық қорғау органдарына дереу арыздануға шақырды. Депутаттың айтуынша, қазіргі заманауи технологиялар желідегі кез келген заңсыз әрекеттің «цифрлық ізін» анықтауға мүмкіндік береді. Сондықтан жасырын аккаунт иелерін тауып, жауапқа тарту полиция үшін қиындық тудырмайды.

Асхат Аймағамбетов бұл әрекеттердің тек Әкімшілік кодекспен шектелмейтінін, кей жағдайларда Қылмыстық жауапкершілікке де соқтыруы мүмкін екенін ескертті. Кәмелетке толмаған оқушылардың желідегі әдепсіз қылықтары мен қорлау әрекеттері үшін олардың ата-аналары заң алдында жауап береді. Бұл шаралар мұғалімнің қоғамдағы мәртебесін қорғау және мектеп ортасындағы кибербуллингке тосқауыл қою үшін қажет.