Ауыл мектептерінің оқушылары арасындағы Республикалық олимпиаданың жеңімпаздары анықталды

Ауыл мектептерінің оқушылары арасында жаратылыстану-математикалық бағыт бойынша өткен II Республикалық олимпиаданың қорытынды кезеңінде 486 оқушы бақ сынады. Олардың ішінде 221 оқушы жеңімпаз атанды.

Олимпиада жеңімпаздарын марапаттау рәсіміне Орта білім беру комитетінің төрағасы Қаныбек Бекболатов қатысты.

«Оқу-ағарту министрлігі ауыл мектептерінің дарынды оқушыларын анықтау үшін республикалық олимпиаданы екінші жыл қатарынан ұйымдастырып келеді. Былтыр олимпиаданың бірінші кезеңіне 78 мың оқушы қатысса, биыл олардың саны 113 мыңнан асты. Бұл ауыл оқушыларының интеллектуалдық жарыстарға қызығушылығының артып жатқанын көрсетеді. Баршаңызды жеңістеріңізбен құттықтап, алдағы уақытта да үлкен жетістіктер тілеймін!» – деді Бекболатов.

Жалпы олимпиадада 42 алтын, 62 күміс және 117 қола медаль сарапқа салынды. «Үздік олимпиадалық команда» атағын Қызылорда, Түркістан және Маңғыстау облыстарының құрама командалары иеленді.

Жеңімпаздарға еліміздің жетекші жоғары оқу орындарының ректорлық гранттары табысталды: 6 грант – SDU университетінен, 2 грант – Халықаралық Қожа Ахмет Ясауи университетінен. Математика, физика және информатика пәндері бойынша жеңімпаз атанған оқушыларға Алматы қаласындағы Республикалық физика-математика мектебіне оқу гранты берілді.

Қорытынды кезеңге қатысқан барлық оқушы «Дарын» сырттай мектебіне қабылданады. Ал I дәрежелі диплом иегерлері 2025 жылғы наурызда өтетін жалпы білім беретін пәндер бойынша республикалық олимпиаданың соңғы кезеңіне қатысады.