Ата-аналардың есепшоттарына балаларын мектепке дайындау үшін 20 млрд теңге аударылды

Қазақстанда жаңа оқу жылы қарсаңында «Жалпыға бірдей білім беру» қоры аясында ата-аналардың және заңды өкілдердің есепшоттарына шамамен 20 млрд теңге аударылды. Бұл қаражат мектеп формасын, аяқ киім мен оқу-құралдарын сатып алуға бағытталды. Қолдау 430 мыңнан астам баланы қамтыды, бұл жалпы алушылардың 87%-ына жуық. Бұл жөнінде ҚР Оқу-ағарту министрлігінің баспасөз қызметі хабарлады.

2025 жылы 500 мыңнан астам балаға көмек көрсетілмек. Оның ішінде жетім балалар, ата-анасының қамқорлығынсыз қалғандар, аз қамтылған және атаулы әлеуметтік көмек алушы отбасылардың балалары, сондай-ақ өмірлік қиын жағдайға тап болғандар бар.

Министрліктің дерегінше, бүгінде Астана мен Шымкент қалаларында қаражат толық көлемде аударылып, барлық отбасы көмек алған.

«Өңірлер ата-аналардың есепшоттарына қаражатты аударып жатыр. Көмек алғандар сатып алынған тауарларды растайтын құжаттарды ұсынуы тиіс. Төлемді алу үшін өтініш жазу жеткілікті», – деді Балалардың құқықтарын қорғау комитетінің төрайымы Насымжан Оспанова.

2025 жылы қор бойынша жалпы қаржыландыру көлемі – 23,1 млрд теңге. Төлем мөлшері өңірлік бюджетке сәйкес мәслихат шешімі негізінде белгіленеді және бір балаға кемінде 46 228 теңгеден төмен болмауы тиіс.

Айта кетейік, 2023 жылдан бері материалдық көмек көлемі 2,5 есе өсіп, 17 мыңнан 46 мың теңгеге дейін артқан.