Астаналық оқушылар Хьюстондағы FIRST World Championship әлемдік додасында топ жарды

Хьюстон қаласында (АҚШ) 29 сәуір мен 2 мамыр аралығында робототехника және STEM бағыты бойынша ең беделді халықаралық дода – FIRST World Championship аяқталды. Әлемнің 66 елінен жиналған ең үздік жас инженерлер бәсекесінде қазақстандық оқушылар жоғары нәтиже көрсетті.

Биылғы әлемдік біріншілікте FTC санаты бойынша бақ сынаған 342 команданың арасында Қазақстан намысын 12 мектеп құрамасы қорғады. Соның ішінде Астана қаласындағы Республикалық физика-математика мектебінің (РФМШ) FoxSlide және Fizmat Robotics командалары өздерінің кәсіби дайындығы мен инженерлік шеберлігін паш етті.

Саяси және техникалық маңызы бар дода қорытындысы бойынша:

• Fizmat Robotics командасы Franklin дивизионында беделді Reach Award (1-орын) жүлдесін иеленді.

• FoxSlide командасы чемпионаттың плей-офф сатысына өтіп, әлемдік рейтингтегі мықтылардың қатарынан көрінді.

Reach Award марапаты STEM-қоғамдастығының дамуына ерекше үлес қосқан және инженерлік білімді кеңінен насихаттаған командаларға беріледі. Төрешілер алқасы астаналық оқушылардың бір жыл ішінде 4 миллионнан астам адамды қамтитын ағартушылық жобаларды іске асырып, 22 жаңа команданың құрылуына септігін тигізгенін жоғары бағалады.

Сонымен қатар Fizmat Robotics мүшелері әлеуметтік жауапкершілік аясында балалар үйлері мен инклюзивті орталықтарда шеберлік сабақтарын өткізіп, саланы дамытуға арналған цифрлық платформа әзірлеген. Сарапшылардың пікірінше, бұл жетістік отандық инженерлік мектептің әлемдік деңгейдегі бәсекеге қабілеттілігін тағы бір мәрте растады.

Командалардың халықаралық жарысқа қатысуына РФМШ әкімшілігі мен Fizmat Endowment Fund қоры қолдау көрсетті.