Астанада «INFOMATRIX-ASIA 2025» жарысы өтті

Байқауды Қазақстан Республикасы Оқу-ағарту министрлігінің «Дарын» республикалық ғылыми-практикалық орталығы мен «БІЛІМ-ИННОВАЦИЯ» Халықаралық қоғамдық қоры ұйымдастырды. Сондай-ақ Қазақстанның жетекші жоғары оқу орындары үздік жас өнертапқыштарға білім гранттарын тағайындап, олардың кәсіби дамуына қолдау көрсетті.

INFOMATRIX-ASIA биыл 9 негізгі бағыт бойынша өтті:

• Жасанды интеллект бағдарламалау

• Жасанды интеллект хакатоны

• Стартап жобалар

• Аппараттық басқару

• Қолданбалы ғылыми жобалар

• Компьютерлік графика және өнер

• Қысқаметражды фильм

• Arduino хакатоны

• LEGO эстафета

Байқаудың салтанатты рәсімінде ҚР Парламенті Мәжілісінің депутаты Асхат Аймағамбетов, «БІЛІМ-ИННОВАЦИЯ» Халықаралық қоғамдық қорының президенті Дархан Өте, Оқу-ағарту министрлігінің өкілдері, шетелдік сарапшылар, беделді жоғары оқу орындарының профессорлары мен IT саласының жетекші мамандары сөз сөйлеп, жас буынды жігерлендіретін лебіздерін білдірді.

Шара қорытындысы бойынша қатысушылардың тең жартысы түрлі жүлделерге ие болды. Олар алтын, күміс, қола медальдармен және арнайы грамоталармен марапатталды. 

Сондай-ақ байқауға белсенді демеушілік танытқан жоғары оқу орындары да 25%, 50%, тіпті 100% көлеміндегі білім гранттарын бөліп, талантты жастарға қолдау көрсетті. SDU мен Narxoz университеттері үздік шыққандарға 6-6 гранттан бөлсе, АЭжБУ университеті барлық жүлдегерді тегін оқу гранттарымен қамтыды.

Үш күнге созылған INFOMATRIX-ASIA 2025 байқауы жастардың ғылым мен технологияға деген қызығушылығын арттырып қана қоймай, олардың әлемдік деңгейдегі бәсекеге қабілеттігін айқын көрсетті. Ұйымдастырушылардың айтуынша, бұл шара жыл өткен сайын өз ауқымын кеңейтіп, IT саласында жаңашыл жобалар ұсынатын жас буынның сенімді алаңына айналып келеді.