Әрбір бесінші құрбан - бала: Судағы қайғылы жағдайлармен қалай күресеміз?

Қазақстанда мектеп оқушылары үшін жүзу сабақтары міндетті факультатив ретінде енгізілмек. Оқу-ағарту министрлігі бұл бастаманы кәсіби спорттық үйірме емес, ең алдымен балалардың судағы қауіпсіздігін қамтамасыз ету шарасы деп түсіндірді.

Еліміздегі статистика көңіл көншітпейді: соңғы үш жыл ішінде су айдындарында 151 бала қаза тапқан. Бұл Қазақстанда суға кеткендердің әрбір бесіншісі кәмелетке толмаған жасөспірім екенін көрсетеді. Осы жағдайды түзейтін пилоттық жоба алдағы оқу жылында Астана мен Алматы қалаларында бастау алады деп жоспарлануда. Бағдарламаға ең алдымен жүзуді тез үйренетін және су айдындарында жиі қауіпке тап болатын 2-4 сынып оқушылары қатысады.

Оқу-ағарту министрлігі Ұлттық ғылыми-практикалық дене тәрбиесі орталығы бас директорының орынбасары Наталья Дрейттің айтуынша, басты міндет - баланы су бетінде ұстап тұруды үйрету.

«Бұл спорттық жетістіктерді талап ететін секция емес, бұл - қауіпсіздік шарасы. Жүзу сабағы дене шынықтыру пәнінің негізгі оқу жоспарын алмастырмайды, ол қосымша факультатив ретінде жүргізіледі», - деп атап өтті ол.

Жобаның ерекшелігі - оны іске асыруға бюджеттен қаражат жұмсалмайды. Қаржыландыруды Су спорт түрлері федерациясы толықтай өз мойнына алған. Сарапшы Евгений Азарьевтің есебінше, қазіргі таңда 1000 баланы қамту үшін шамамен 45 миллион теңге қажет. Мамандар бұл жоба тек қауіпсіздікті емес, болашақта кәсіби спортқа келетін чемпиондарды іріктеуге де септігін тигізеді деп үміттенеді.

Жалпы алғанда, пилоттық жобаның алғашқы кезеңінде 5000 баланы қамту көзделіп отыр. Сабақтар аптасына 2-3 рет өткізілетін болады.