Алматыдағы ірі құрылыс: Метроның жаңа желісі үшін жер учаскелері қалай алынады және өтемақы қалай төленеді

Алматы қаласының әкімдігі метрополитеннің жаңа желісін тарту мақсатында 30-дан астам жер учаскесін иеліктен шығару туралы шешім қабылдады. Тиісті қаулыға қала басшысы Дархан Сатыбалды қол қойды.

Метроның жаңа желісі «Жібек жолы» станциясынан басталып, Алматы халықаралық әуежайына дейін жалғасады. Жер учаскелерін мемлекет қажеттілігі үшін қайтарып алу процесі 2028 жылдың 31 желтоқсанына дейін толық аяқталуы тиіс. Қалалық Жер қатынастары басқармасына заңнамада белгіленген тәртіппен мүлік иелеріне тиісті өтемақы төлемдерін уақытылы жүргізу міндеттелді.

Мемлекет меншігіне алынатын жылжымайтын мүліктер негізінен Медеу және Түрксіб аудандарына қарасты аумақтарды қамтиды. Олардың қатарында:

 Құлжа тас жолы бойындағы бірқатар объектілер;

 «Нұршашкан» шағын ауданындағы (Бердіқожа батыр, Санлақ, Новостройка көшелері) тұрғын үй және өндірістік учаскелер;

 «Дехан» өндірістік кооперативі мен әуежай маңындағы аумақтар бар.

Бұған дейін мамыр айында «Қалқаман» метро станциясын ашу биылғы желтоқсанға жоспарланғаны хабарланған болатын. Сонымен қатар, Үкімет деңгейінде метро желісін Алатау қаласына дейін ұзарту мәселесі де күн тәртібінде тұрғаны айтылды.