Алматы облысының мектептеріне “Білім-инновация” лицейлерінің тәжірибесі енгізіліп жатыр

Алматы облысының әкімдігі «Қазақстан халқына» Қорымен бірлесіп, облыс мектептеріне «БІЛІМ-ИННОВАЦИЯ» лицейлерінің тәжірибесін енгізу жұмысын жүргізіп жатыр.

Жобаға 50 мектеп таңдап алынды. Оның 42-сі ауылдағы, 8-і қаладағы мектеп. Оған жергілікті бюджеттен 756 млн. теңге қаражат бөлінді. 

Жобаның мақсаты – педагогтердің кәсіби әлеуетін арттыру, олимпиадалық қозғалысты енгізу мен бекіту, ұлттық құндылықтар негізінде білім беру философиясын қалыптастыру және дамыту үшін жағдай жасау. 

Осы жоба аясында 2023 жылдың 12 маусым-10 желтоқсан аралығында  3847 педагог «ХХІ ғасырдағы білім беру негіздері», ағылшын тілі және жаратылыстану циклі (химия, биология, физика, информатика) пәндері бойынша және құндылықтарға негізделген білім беру тақырыптарында біліктілікті арттыру курстарына қатысты және Астана қаласында өткен «Басқарушылық білім беру» турына 50 мектептің директоры қатысып, кәсіби біліктіліктерін арттырды. Сонымен қатар олимпиадалық қозғалысты дамыту бағытында ауыл мектептерінен 50 дарынды оқушы Астана қаласында арнайы оқуға қатысып, пәндік құзыреттіліктерін жетілдірді.  

Қазақстан Халқына Қорының қолдауымен 1 542 520 740,0 теңге қаражатқа  осы жоба аясында 50 мектептің 150 оқу кабинеті (физика, химия, биология) жабдықталды. Оның ішінде 111 кабинет (1 280 162 970,0 теңге) толық жаңадан жабдықталса, 39 кабинет (262 357 770,0 теңге) қосымша құрал-жабдықтармен толықтырылды.  

Осы жоба барысында «БІЛІМ-ИННОВАЦИЯ» лицейінің менторлары биыл 22-26 қаңтар аралығында зертханалық құрал-жабдықтарға байланысты мұғалімдерге нұсқаулық жасау мақсатында бір күндік оқыту семинарын өткізді. Оқыту семинарына 108 физика, 117 химия және 184 биология пәні барлығы, 409 педагог қатысты. 

“Алматы облысының 50 мектебінің мұғалімдеріне «БІЛІМ-ИННОВАЦИЯ» лицейлерінің тәжірибесін енгізу жобасы аясында курстар өткіздік. Физика, химия, биология пәнінің мұғалімдеріне сабақ өттік. Ал кабинеттерді “Қазақстан халқына” қоры жабдықтады. Бір жағынан, мұғалімдер академиялық білім алса, екінші жағынан кабинеттер жабдықталып, оқушыларға сабақ өтетін жақсы жағдай жасалды. Біздің менторлар мұғалімдердің сабағына қатысып, бақылайтын болады”, – деді «БІЛІМ-ИННОВАЦИЯ» ХҚҚ жобалар координаторы Саулембеков Амирхан.

2024 жылдың 27 ақпан күні Талғар ауданы №2 орта мектепте Алматы облысы мектептеріне «БІЛІМ-ИННОВАЦИЯ» лицей тәжірибесін енгізу аясында жабдықталған модификациялық кабинеттердің ашылуы өтті. Оқушылар игілігіне пән кабинеттерді берудегі салтанатты рәсімге Алматы облысы әкімінің бірінші орынбасары Нұрлан Ерғалиұлы Әбдірахым, «Қазақстан Халқына» қоғамдық қорының төрағасы Болат Бидахметұлы Жәмішев, «Білім-Инновация» халықаралық қоғамдық қорының 1-ші вице-президенті Ержан Бейсембекұлы Аубакиров, «Jelken foundation» қоғамдық қорының директоры Арман Сайлаубекұлы Байгаскин қатысты.