Алматы облысының білім беру жүйесі әлемдік деңгейде танылды

Алматы облысы World Innovation Award 2024 сыйлығын «Сапалы білім» номинациясында жеңіп алып, білім беру саласында халықаралық деңгейде жоғары бағаға ие болды. Байқауда 128 ел бақ сынады. Бұл туралы облыс әкімдігі хабарлады.

Әкімдіктің жазуынша, өңірдің бұл жетістігі білім беруді дамытудағы инновациялық тәсілдерінің тиімділігін айқын дәлелдейді. Облыс 366 мың оқушыға заманауи білім беру ортасын құруға бағытталған кешенді стратегияны жүзеге асырып келеді.

Жетістіктің негізгі факторлары қатарында жаңа мектептердің құрылысы, халықаралық ынтымақтастықты кеңейту, дарынды балаларды қолдау және білім сапасын арттыруға бағытталған инвестициялар бар. Соңғы жылдары 19 жаңа мектеп салынып, 18 мыңнан астам оқушыға орын пайда болды, ал үш ауысымды мектептер саны қысқарды. Қытай университеттерінде оқуға грант алған оқушылар саны өсіп, сингапурлық және ресейлік компаниялармен ынтымақтастық нығайды.

«50 табысты мектеп» жобасы аясында «БІЛІМ-ИННОВАЦИЯ» және «Қазақстан халқына» қорларымен бірлесіп, 50 мектептің үш мыңнан астам мұғалімі мен 42 мыңнан астам оқушысы арнайы дайындықтан өтті. Қорлардың қолдауымен физика, химия және биология бойынша 150 оқу кабинеті жабдықталды.

Облыстағы дарынды оқушылар олимпиадаларда жоғары нәтижелерге қол жеткізіп жүр. 2023-2024 оқу жылында республикалық және халықаралық олимпиадалардың жүлдегерлері көбейіп, оқушылар 14 халықаралық және 131 республикалық медаль алды. Облыстық деңгейде 2804 оқушы жеңімпаз атанды.

Сонымен қатар мектептердің материалдық-техникалық базасы жаңартылып, жаңа оқу кабинеттері ашылды. 2024 жылы білім беру мекемелерін дамытуға 590 млн теңге бөлінді. "Ауылдық мектептердің әлеуетін дамыту" жобасы аясында 6 ауыл мектебі заманауи жабдықтармен қамтамасыз етілді.

2022 жылы Алматы облысының әкімдігі мен SDU университеті арасында білім беру саласындағы ынтымақтастық туралы меморандумға қол қойылды. Құжат аясында оқушылар мен жастар арасында кәсіби бағдар беру жұмыстары, мұғалімдер дайындау, ғылыми қызметкерлерді қазылар алқасына тарту және олимпиадалық резерв үшін оқу-жаттығу жиындарын өткізу жұмыстары жүріп жатыр.