Ақтөбеде бір күнде 350 студент оқудан шығарылды: ата-аналар сотқа жүгінбек

Ақтөбеде Халықаралық қазақ-орыс университетінде оқитын 350 студент бір күнде оқудан шығарылды. Бұл туралы Azattyq Rýhy хабарлады. Жаңа семестр ортасында студенттер үшін бұл шешім төбеден жай түскендей болды.

Оқудан шығару туралы бұйрық 18 наурызда шыққан. Ал студенттер оны тек 26 наурызда ғана естіген. Оған дейін ешқандай ресми ескерту берілмеген. Көпшілігі қашықтан оқып жатқанын, оқу ақысын уақытылы төлеп отырғандарын айтты.

"Кураторым «Платонус» арқылы оқисың, университетке келудің қажеті жоқ» деді. Мен тапсырмаларымды орындап отырдым. Екі жыл бойы ақшамды да төледім. Енді сабаққа қатыспадың деп оқудан шығарып отыр", – деді 2-курс студенті Құралай Құрман.

Университет өкілдерінің айтуынша, студенттердің 91-і оқу ақысын төлемесе, 259-ы сабаққа мүлде қатыспаған.

Алайда ата-аналар бұған келіспейді.

"Университеттегі оқытушылар құрамы толық емес, соның салдарынан көптеген пән талапқа сай оқытылмайды", – деді олар.

Даулы оқиға облыс әкімдігі мен министрлікке дейін жетті.

"Студенттер мен ата-аналарға келісімшарт аясында сотқа жүгінуге болатыны түсіндірілді. Ғылым және жоғары білім минстрлігіне арнайы хат жолдадық. Министрлік мәселені бақылауға алды. Арнайы зерделеу тобын құрып, бұл университеттегі жағдайды бақылауға алатын болады", – деді облыс әкімінің орынбасары Жолдас Батырхан.