АҚШ Гарвард университетіне шетелдік студенттерді қабылдауға тыйым салды

АҚШ президенті Дональд Трамптың әкімшілігі Гарвард университетіне шетелдік студенттерді оқуға қабылдауға тыйым салды, деп хабарлады The New York Times. Ішкі қауіпсіздік министрі Кристи Ноэм университетті зорлық пен антисемитизмді насихаттады деп айыптап, шетелдіктерге студенттік виза беруге мүмкіндік беретін рұқсатнамасын жойған.

Енді Гарвард университеті шетелдік студенттерге виза алу үшін қажетті құжаттар бере алмайды. Қазірдің өзінде оқып жатқан студенттер басқа оқу орнына ауыспаса, елден шығарылады.

Гарвард әкімшілігі бұл шешімді заңсыз және кек алу әрекеті деп атап, университеттің академиялық және ғылыми миссиясына қатты соққы болғанын айтты. Қазіргі таңда Гарвардта 140 елден келген 7000-ға жуық шетелдік студент оқып жатыр. Бұл барлық студенттердің ширегінен асады.

Бұған дейін университетке бөлінетін 2,2 миллиард доллар көлеміндегі федералдық гранттар тоқтатылған еді. Оларды қайта ашу үшін университетке "Америка құндылықтарына қарсы" студенттерден бас тартатын жүйе әзірлеу, сондай-ақ антисемитизм мен жек көруді насихаттауға қарсы аудит жүргізу талап етілген. Гарвард бұл талаптарды орындаудан бас тартып, АҚШ үкіметіне қарсы сотқа арыз түсірді.

АҚШ билігі осындай шектеулерді тағы 60-тан астам университетке енгізуі мүмкін.