22 елдің ішінен дара шықты: Айсұлтан Омар JBMO 2026 олимпиадасының абсолютті чемпионы атанды

Бұл айтулы жеңістің басты қаһармандары - еліміздің мақтанышына айналған жас данышпандарымыз. Алматы қаласындағы «Nurorda» мектеп-лицейінің 9-сынып оқушысы Айсултан Омар өзінің феноменалды интеллектуалдық қабілетін көрсетіп, олимпиаданың абсолютті жеңімпазы атанды және бас жүлдені иеленді. Онымен бірге Маңғыстау облыстық «Білім-инновация» лицей-интернатының 9-сынып оқушысы Сұлтан Төребек те ерекше логикасы мен тапқырлығының арқасында екінші алтын медальды қанжығасына байлады. Күміс жүлдені Алматы қаласындағы NIS оқушысы Арнұр Кәрібай мен РФММ оқушысы Темір Оразбек сенімді түрде иеленіп, отандық физмат мектептерінің жоғары деңгейін тағы бір мәрте дәлелдеді. Ал Түркістан облыстық «Білім-инновация» лицейінің 10-сынып оқушысы Ілияс Дінмұхамедұлы мен Павлодар қаласындағы №8 лицей-мектебінің 10-сынып оқушысы Алихан Куракбаев жүлделі қола медальдарды еншіледі.

Жасөспірімдердің халықаралық аренадағы мұндай зор триумфы - дарынды оқушыларымыздың тынымсыз еңбегімен қатар, оларды баптап осы деңгейге жеткізген жетекшілердің ерен еңбегінің жемісі. Ұлттық құраманың дайындығын жоғары деңгейде ұйымдастырып, жас математиктерді жеңіске жетелеген халықаралық олимпиадалардың жүлдегері Марат Нсанбаев пен «Дарын» республикалық ғылыми-практикалық орталығының маманы Перизат Саутбекованың кәсіби шеберлігі зор қошеметке лайық. Ел абыройын асқақтатқан жас дарындарымызды, олардың ата-аналары мен бапкерлерін осы жарқын жеңісімен құттықтаймыз!