100 үздік колледж студенті анықталады

Қазақстанда колледж студенттері арасында «Қазақстан Республикасы колледждерінің Үздік 100 студенті» республикалық байқауы ресми түрде старт алды. Жобаның мақсаты – білім мен кәсіби шеберлігі, белсенді өмірлік позициясы арқылы ерекшеленетін студенттерді анықтау және олардың жетістіктерін бүкіл елге көрсету.

Байқау техникалық және кәсіби білім беру жүйесінің беделін көтеруге, жұмысшы мамандықтарының тартымдылығын арттыруға, жастардың көшбасшылық әлеуетін ашуға және оларға кәсіби өсу перспективасын ұсынуға бағытталған.

Байқауға Қазақстанның барлық өңірлерінен колледж студенттері қатыса алады. Қатысушылар ретінде WorldSkills чемпионаттарының жеңімпаздары мен қатысушылары, кәсіби шеберлік конкурстарының қатысушылары, студенттік өзін-өзі басқару және волонтерлік қозғалыс лидерлері, инновациялық идеялар мен стартап авторлары, ғылыми конференциялар, олимпиадалар мен спорттық жарыстардың жүлдегерлері, сондай-ақ шығармашылық топтардың белсенді мүшелері шақырылады. Соңғы үш жылдағы жеңімпаздар қайта қатыса алмайды.

Байқау үш кезеңде өтеді:

1. Колледж ішіндегі іріктеу – әр колледжден 5-тен артық кандидат ұсынылмайды. Бұл кезеңде студенттердің оқу жетістіктері, кәсіби табыстары және қоғамдық белсенділігі бағаланады.
2. Аймақтық кезең – әр облыс пен республикалық маңызы бар қаладан 10 үздік кандидат іріктеледі, олардың жетістіктері кешенді түрде бағаланады.
3. Республикалық финал – соңғы таңдау «TOP-100 STUDENTS» интернет-ресурсында жүргізіліп, елдегі 100 үздік колледж студенті анықталады.