Жекеменшік мектептерді жаңа тәсілмен қаржыландыра бастады

Енді елімізде жекеменшік мектептерге қаржы e-Qazyna платформасындағы OrtaBilim атты жаңа цифрлық сервис арқылы бөлінеді. Бұл туралы Қазақстан Республикасы Қаржы министрлігінің баспасөз қызметі хабарлады.

Жаңа жүйе іске қосылған алғашқы күндері-ақ Маңғыстау облысындағы «ADVANTA.KZ» жеке мектеп-лицейінің шотына 108 миллион теңгеден астам қаржы аударылған.

Қаржы министрлігінің мәліметінше, OrtaBilim сервисі қаржыландыру процесін жеңілдетіп, барынша ашық ету үшін әзірленген. Енді барлық бюджет, реестр, мектептердің өтінімі мен кезегі ашық қолжетімді форматта жарияланады. Бұл шешім сыбайлас жемқорлық тәуекелдерін азайтуға бағытталған.

Бұған дейін жүргізілген аудит барысында жекеменшік білім беру саласында бірқатар заң бұзушылық анықталған болатын. Атап айтқанда, оқушылар санының жалған көрсетілуі, жұмыс істемейтін педагогтардың тізімге енгізілуі және мектеп ғимараттарының талапқа сай келмеуі сияқты фактілер тіркелген.

«Енді жаңа жүйенің форматты-логикалық бақылауының арқасында әр мектеп пен мұғалім, оқушы деректері автоматты түрде мемлекеттік базалармен салыстырылады. Әрбір оқушының және педагогтың ЖСН нөмірі нақты тексеріледі», – деп мәлімдеді министрлік өкілдері.

Сонымен қатар оқушылар туралы мәліметтер электронды күнделік жүйесімен біріктіріліп, жекеменшік мектептерге қаржы нақты оқушылар санына қарай төленеді.

Қазіргі таңда еліміздің барлық өңірі дерлік өз бюджеттерін жариялап үлгерді. Жалпы 64 миллиард теңге көлемінде қаржы бөлу көзделіп отыр.

Алайда Ұлытау, Қызылорда және Ақмола облыстары бұл тізімге әзірге енбеген.

Қаржы министрлігінің түсіндіруінше, жергілікті білім басқармалары өз бюджеттерін жариялағаннан кейін ғана мектептер қаржыландыруға өтінім бере алады.