ҰБТ-дан жоғары балл жинаса да, грантсыз қалған талапкерлер Ғылым министрлігінің үстінен арыз түсірмек

Кейбір талапкер ҰБТ-да жоғары ұпай жинаса да, су тасқынынан зардап шеккен аймақтың талапкерлеріне бөлінген квота салдарынан грантсыз қалып отыр. Заңгер Айжан Шералиева Алматыда өткен баспасөз конференциясында мұндай квотаны енгізу заңға қайшы деп айтты. Оның айтуынша, бұл жоба Ашық НҚА сайтында екі апта тұрып, бір-ақ адаммен талқыланған. Ол қоғамның жоба жайлы хабары болмағанын және оның заңды күші жоқ екенін айтып өтті. Енді талапкерлер мен ата-аналар Ғылым және жоғары білім министрлігінің үстінен арыз жазбақ, деп хабарлады Власть басылымы.

Медина Майсар мен басқа да үміткерлер қазіргі жағдайды президентке жеткізуді сұрайды.

«Мен ҰБТ-дан 119 балл алдым, құқық мамандығына тапсырдым, төтенше аймақтарға арналған квотаға сәйкес кейбіреулер (талапкерлер) төмен балл жинаса да, грантқа ие болды», – дейді ол.

Талапкер Ғылым және жоғары білім министрлігі оның құқығын бұзды деп есептейді. Ол министр Саясат Нұрбекке сенім артпайды, оның отставкаға кетуін талап етеді.

ҰБТ-да 117 балл жинаған Илона Еркімбаева да грантқа іліккен жоқ. Ол екі жылдан астам уақыт тестілеуге дайындалған. 

Талапкерлердің ата-анасы жоғары балл жинаған балаларының грантқа түсе алмағанына таңданады.

«Гранттардың 20 пайызы біздің балалар есебінен болмауы керек. Қазіргі уақытта балаларымыз қосымша грантқа түсе алмайды. Өңірлерден келген балалардың таланты мен біліміне еш күмәніміз жоқ, бірақ бұл ретте басқалардың грантын тартып алудың қажеті жоқ», – дейді ата-аналардың бірі. 

Заңгер Халида Әжіғұлова уақыт талапкерлерге қарсы жұмыс істеп жатқанын атап өтті. Олар 25 тамызға дейін құжаттарын тапсыруы керек. Оның пікірінше, бұл республикалық деңгейдегі жағдай, өйткені Қазақстан Республикасы Конституциясының бірқатар бабы бұзылған.

Оның пікірінше, Ғылым және жоғары білім министрлігі атқарушы орган бола тұра, заң шығарушы органның, яғни парламенттің өкілеттерін алып алған.

Қазір талапкерлер мен ата-аналар Ғылым және жоғары білім министрлігіне қарсы топтық талап-арыз дайындап жатыр. Министрліктің бұл шағымға жауап беруі үшін 20 күн уақыты бар.