Түркістан облысының әкімі «Дара ұрпақ» инклюзивті театрының ұжымымен кездесті

Түркістан облысының әкімі Нұралхан Көшеров Түркістан қаласындағы «Дара ұрпақ» инклюзивті театрына арнайы барып, шығармашылық ұжыммен және жас әртістермен кездесті. Жылы шырайлы өткен жүздесу барысында өнерпаздар өз өнерлерін ортаға салып, театр негізін қалаушылар өңір басшылығына қолдау көрсеткені үшін алғыс білдірді.

Облыс әкімі ерекше қажеттіліктері бар балалардың өнердегі қадамдарына қолдау білдіріп, театрға заманауи музыкалық құрылғыларды сыйға тартты.

«Мемлекет басшысы Қасым-Жомарт Кемелұлы Тоқаев инклюзивті қоғам қалыптастыруға және білім беру жүйесін жетілдіруге ерекше назар аударады. Түркістан өңірінде де бұл бағытта жүйелі жұмыстар атқарылуда. Өнер жолындағы дарынды балаларымызбен мақтанамыз, олардың шығармашылық табыстарына тілектеспін», – деді Нұралхан Көшеров.

2025 жылдың 17 желтоқсанында ашылған «Дара ұрпақ» театры – Түркістан облысындағы тұңғыш, ал республикадағы ерекше балалармен кәсіби жұмыс істейтін алғашқы инклюзивті орталықтардың бірі. Облыс әкімдігінің қолдауымен берілген арнайы ғимарат қазіргі таңда 100-ге жуық ерекше баланың әлеуметтік бейімделуіне арналған алаңға айналды.

Театрда актерлік шеберлік, вокал және хореографиямен қатар, психологтар, нейропсихологтар, дефектологтар мен АВА-терапевтер балалардың дамуына кешенді көмек көрсетеді. Жарты жыл ішінде балалардың эмоциялық тұрақтылығы мен сөйлеу қабілеттерінің жақсарғаны байқалады.

Кездесу барысында театрдың болашақ жоспарлары да талқыланды. Атап айтқанда, ұжым Түркістан облысының аудандарында және Шымкент, Тараз, Қызылорда қалаларында гастрольдік сапармен өнер көрсетуді жоспарлап отыр. Сонымен қатар Қазақстандағы ерекше қажеттіліктері бар балалардан тұратын алғашқы оркестрді құру идеясы қарастырылуда.