Түркістан облысында стратегиялық маңызы бар Сарыағаш айналма жолының құрылысы басталды

Түркістан облысында Мемлекет басшысы Қасым-Жомарт Тоқаевтың тапсырмасы аясында халықаралық транзит үшін аса маңызды «Сарыағаш қаласының айналма жолы» жобасының іргетасы қаланды.

Өңір басшысы Дархан Сатыбалдының қатысуымен өткен салтанатты шарада жаңа республикалық маңызы бар автожолдың құрылысы ресми түрде іске қосылды. Бұл нысан Орталық Азиядағы көлік-логистикалық әлеуетті арттырып, халықаралық транзиттік дәліздерді жаңғыртуға серпін бермек.

«Сарыағаш – еліміздің оңтүстігіндегі ең ірі транзиттік тораптың бірі. Қолданыстағы жолдың жүктемесі нормадан 6 есе асып кеткен. Жаңа айналма жол кептеліс мәселесін түбегейлі шешіп, қауіпсіздікті қамтамасыз етеді», – деп атап өтті жиында сөз алған жауапты тұлғалар.

Жобаның басты көрсеткіштері:

• Жалпы ұзындығы: 102,6 шақырым (Сарыағаш ауданы – 43 км, Келес ауданы – 58,6 км).

• Санат: І-техникалық санатты, 4 жолақты заманауи жол.

• Инфрақұрылым: 8 жолайрығы, 22 көпір, 2 теміржол өткелі және 26 аялдама.

• Құны: 204 млрд теңге (халықаралық қаржы институттарының қолдауымен).

• Пайдалануға беру мерзімі: 2029 жыл.

Жаңа жол тек транзиттік жүк көліктеріне ғана емес, Мақтаарал, Жетісай, Шардара бағытына қатынайтын жергілікті тұрғындар үшін де жайлы жағдай жасамақ. Сондай-ақ, ауыл шаруашылығы техникалары мен мал өтуіне арналған 21 арнайы учаске қарастырылған.

Айта кетейік, биыл өңірде 1138 шақырым жолды жаңғырту жоспарланса, жыл соңына дейін «Дарбаза-Мақтаарал» теміржол желісінің құрылысы аяқталады деп күтілуде.