Тоқаев халықаралық пән олимпиадаларының жеңімпаздары мен жүлдегерлеріне қаржылай сыйақы табыстады

Мемлекет басшысы Қасым-Жомарт Тоқаев Ақордада халықаралық пән олимпиадаларының жеңімпаздары және жүлдегерлерімен кездесті. Салтанатты іс-шараға химия, математика, физика, география, информатика және биология пәндерінен үздік нәтиже көрсеткен 24 лауреат шақырылды. Олардың қатарында 4 алтын, 11 күміс және 9 қола медаль иегері бар.

Президент жас дарындарды жеңістерімен құттықтап, білім әлеміндегі табыстарын жоғары бағалады. Мемлекет басшысы жеңіс тек дарындылықтың ғана емес, ең алдымен еңбектің, табандылық пен үздіксіз ізденістің жемісі екенін атап өтті.

"Жүзден жүйрік, мыңнан тұлпар шығу оңай емес. Әр жеңіс, әр медаль тынымсыз ізденіспен, маңдай термен, үздіксіз дайындықпен келеді", – деді Қасым-Жомарт Тоқаев.

Ол дарынды оқушыларды тәрбиелеген ұстаздар мен ата-аналарға алғыс айтып, еліміздің болашағы білімді де жасампаз жастардың қолында екенін ерекше атап өтті.

Президент соңғы жылдары оқушылардың халықаралық білім сайыстарында жоғары нәтиже көрсетіп келе жатқанын мәлімдеді. Былтырдан бері Қазақстан командасы 30-дан астам олимпиада мен ғылыми жарыстарға қатысып, мыңға жуық медаль иеленген. Оның ішінде 200-ге жуығы – алтын, 300-ден астамы – күміс, шамамен 500-і – қола медаль.

Мемлекет басшысы талантты жастарға жан-жақты қолдау көрсету мемлекеттің басты міндеттерінің бірі екенін айтты. Бұл мақсатта еліміздің әр өңірінде заманауи үлгідегі «Келешек мектептері» ашылып, мұғалім мәртебесін көтеру, ғылым жолындағы жастарды қолдау шаралары жүргізіліп жатыр.

«Болашақ» халықаралық стипендиясы аясында мыңдаған жас әлемнің озық университеттерінде білім алды. Енді осы бағдарламаға ең қабілетті, дарынды балаларды ғана іріктеу керек. Келесі жылдан бастап халықаралық олимпиада жеңімпаздары «Болашақ» бойынша шетелде оқуға мүмкіндік алады, – деді Президент.

Сондай-ақ Қасым-Жомарт Тоқаев еліміздің алдағы дамуында жасанды интеллект мамандары, инженерлер, ғалымдар, педагогтар мен дәрігерлердің сұранысқа ие болатынын айтты. Ол «Росатом» компаниясымен салынатын алғашқы атом электр стансасының ғылыми-техникалық прогрестің символына айналуы тиіс екенін атап, оның атауын халық арасында байқау арқылы таңдауды ұсынды.

Кездесу соңында Мемлекет басшысы алтын медаль иегерлеріне 1500 АЕК, күміс жүлдегерлерге 1000 АЕК, қола жүлдегерлерге 500 АЕК мөлшерінде қаржылай сыйақы сертификаттарын табыс етті.

Президент жастарға әрдайым адалдық пен еңбекқорлықты ту етіп, Отанға қызмет етуге шақырды және олардың Қазақстанды зияткер ұлт ретінде танытып жүргеніне зор сенім артатынын жеткізді.