Tesla Education басшылығына алаяқтық бабы бойынша қылмыстық іс қозғалды

Алматыда Tesla Education оқу орталығының басшылығына қатысты «Алаяқтық» бабымен (ҚК 190-бабы, 3-бөлік) қылмыстық іс қозғалды. Бұл жөнінде Kursiv қалалық Полиция департаментіне сілтеме жасап хабарлады.

Тергеу нұсқасына сәйкес, компания басшылары екі және одан да көп адамға қатысты ірі көлемде алаяқтық жасады деген күдікке ілінген. Бұл бап бойынша жазаның ең ауыр түрі – жеті жылға дейін бас бостандығынан айыру, мүлкін тәркілеу және өмір бойы белгілі бір қызмет атқару құқығынан айыру.

Полицияның мәліметінше, сотқа дейінгі тергеу 18 қараша күні ата-аналардың шағымы негізінде басталған. Олар оқу орталығы келісімшартты бұзғаннан кейін де ақшасын қайтармағанын айтып, арыз жазған.

«Қазіргі уақытта барлық мән-жай анықталып жатыр. Тергеу барысы департамент басшылығының бақылауында», – делінген Полиция департаментінің хабарламасында.

Бұған дейін Tesla Education өкілдері өздерінің алаяқ еместігін айтып, ата-аналарға ақша қайтарылатынын уәде еткен еді. Орталық мәлімдемесінде келесі аптада әрбір зардап шеккен ата-анаға төлем кестесі беріледі деп көрсетілген.

Мәжіліс депутаты Олжас Құспековтің хабарлауынша, Tesla Education-нан зардап шеккен үш мыңға жуық оқушы оқуын өзге орталықтарда тегін жалғастырады.

Атап айтқанда, «Пифагор», «140», «Зерделі» сияқты білім беру ұйымдары зардап шеккен балаларды тегін ҰБТ-ға дайындауға келіскен. Ата-аналар Tesla Education-ға төлеген ақшаны растайтын түбіртек көрсетсе жеткілікті.