Өзіне қол жұмсаған: Түркістан облысында білім саласының бірнеше бухгалтеріне қатысты қылмыстық іс қозғалды

Түркістан облысында білім басқармасы мен аудандық мектептердің бухгалтерлеріне қатысты бірнеше қылмыстық іс қозғалды. Олардың арасында өзіне қол жұмсаған және үйқамаққа алынған қызметкерлер де бар.

Мақтаарал ауданында білім бөлімінің есепшісі А.Қонырбаев өз-өзіне қол жұмсаған. Қылмыстық іс бойынша тергеу басталғанымен, экономикалық тергеу департаменті қызметкерлерінің қылмыстық құқық бұзушылықтары анықталмаған. Бұл тұлға тек куә ретінде жауапқа тартылғаны белгілі болды.

Жетісай ауданында білім саласының есепшілеріне 530 миллион теңге жымқырды деген айып  тағылды. Қылмыстық іс Түркістан облысы прокуратурасына сотқа жолдану үшін тапсырылған. Тергеу барысында мемлекетке 500 миллион теңгеден аса қаражат қайтарылды.

Бәйдібек аудандық білім бөлімінің қызметкерлеріне де 600 миллион теңгені заңсыз иемденді деген күдік тағылды. Бұл іс бойынша 15 күдікті танылған, тергеу барысында шамамен 400 миллион теңге мемлекетке қайтарылған, ал іс жақын уақытта сотқа жолданбақ.

Сондай-ақ Шардара, Сарыағаш және Мақтаарал аудандарында да ірі көлемде қаражат жымқыру фактілері тіркелген. Қылмыстық істер тергеу барысында аяқталып, құжаттармен танысу сатысына жетті. Жалпы, осы істер бойынша мемлекетке 471 миллион теңге қайтарылған.