Ойдан іске: NU – ғылым мен шабыт түйіскен мекен

Назарбаев Университетінде «Ақылды болашақ: студенттік идеялардан әлемдік серпілістерге» атты медиа-тур ұйымдастырылды. Іс-шара барысында жас зерттеушілер мен студенттер экология, энергетика, жасанды интеллект және ғарыш салаларындағы инновациялық жобаларын таныстырды.

Медиа-турды университеттің “Тұрақты даму офисі” ұйымдастырған. Бұл – “Sustainability Living Lab” бағдарламасы аясындағы алғашқы таныстырылымдардың бірі. Бағдарлама бүгінде Қазақстанның 12 жоғары оқу орнын қамтиды және жастардың тұрақты дамуға бағытталған нақты жобаларын жүзеге асыруына мүмкіндік береді. 

Жанна Төлегенқызы дәстүрлі ураннан анағұрлым қауіпсіз әрі тиімді балама – торий энергетикасы жобасын таныстырды. Жобаның ерекшелігі – торий элементінің қолжетімділігі, радиоактивті қалдықтардың аз болуы және әскери мақсатта пайдалануға келмейтіні. Бұл оны болашақта төмен көміртекті энергетика саласының басты бағытына айналдыруға мүмкіндік береді.

Зерттеушілер жасанды интеллект пен нанотехнологияларды біріктіре отырып, торий энергетикасын тек энергия көзі ретінде емес, ауруларды ерте диагностикалау мен экологиялық қауіпсіздікті арттырудың құралы ретінде де қолдануды көздеп отыр.

Сонымен қатар Назарбаев Университетінің студенттері кампусішілік көлік жүйесін жақсартуға бағытталған ерекше жоба – Bulan Bikes электровелосипедтерін таныстырды. Бұл көлік түрінің басты ерекшелігі – Nissan Leaf көлігінің қайта өңделген батареяларының қолданылуы. 

Санжар Серіктің айтуынша, Bulan Bikes тек экологияны қорғап қоймай, студенттердің уақыты мен қаражатын үнемдеуге, сондай-ақ жаяу жүрісті жеңілдетуге арналған. Велосипедтер онлайн-мониторинг жүйесімен жабдықталған. Бұл олардың қозғалысын, заряд деңгейін және пайдалану жиілігін бақылауға мүмкіндік береді.

Шарада тағы бірнеше ерекше жоба ұсынылды:

Watermatic – суару жүйелерін толық автоматтандыратын инновациялық шешім;

EcoWare – бидай ұнынан жасалған биоыдыс-аяқтар;

EcoWoolPellets – қой жүнінен өндірілген экологиялық тыңайтқыштар;

IntelStore – интеллектуалды қоймалау жүйесі;

Whole Genome Project – қазақ халқының генетикалық ерекшеліктеріне арналған зерттеу;

ISSAI институтының KazLLM, Oylan2, TilSync, Beynele сияқты жасанды интеллект жобалары;

Іс-шара соңында networking-сессия ұйымдастырылып, қатысушылар жобаларды сынап көруге, авторлармен пікір алмасуға және идеяларды ауқымдаудың жолдарын талқылауға мүмкіндік алды.

Бұл бастама – Қазақстандағы жас буынның ғылым мен технологиядағы әлеуетін арттыруға, әрі тұрақты даму мақсаттарына үлес қосуға бағытталған нақты қадамдардың бірі.

Ердаулет Тампишов, Дінмұхаммед Болат