Өскемен тұрғындары бар болғаны 880 мың теңгеге асарлатып көпір салып алған

Қаладағы 20-шағынаудан тұрғындары көп жыл бойы биліктен өткел салып беруді сұраған. Алайда шенеуніктер жобаның қымбаттығын алға тартып, өтінішті бірнеше рет кері қайтарған. Ал тұрғындарға жұмысқа және үйге жету үшін бес шақырымдық айналма жолды пайдалануына тура келген.

Сол кезде жергілікті ақсақал Қыдырғазы Баймұратов көршілерін біріктіріп, қазақтың көне дәстүрі - асар әдісімен көпір салуға шешім қабылдаған.

«Өткен жылы бастамашыл топ жиналып, ақшамызды қосып, плиталар мен блоктар сатып алдық. Техника өзімізде бар. Сөйтіп жеңіл көліктерге арналған көпірді салып шықтық. Бәрі шамамен 600 мың теңгеге түсті», - дейді ақсақал Баймұратов.

Фото: Қырдырғазы Баймұратов

Бірақ көп ұзамай көпірмен жүк көліктер де өте бастаған соң, тұрғындар оны күшейтуге қайта кірісіпті. Республика күні қарсаңында тағы да асар жасап, өткелді нығайтып шыққан. Нәтижесінде халық салған нысанның жалпы құны 880 мың теңге ғана болған. Бұл - билік жоспарлаған сомадан бірнеше есе арзан.

Қыдырғазы Баймұратовтың айтуынша, бұл - тұрғындардың бірлігінің көрінісі.