Өркениетті ел боламыз десек, ұстаздарға барынша жағдай жасауымыз керек - Тоқаев

“Білім келешегі: адал азамат, кәсіби маман” тақырыбымен өткен бұл жиын жаңа оқу жылы қарсаңында білім беру жүйесінің бүгіні мен болашағына бағдар беруді мақсат етеді. Конференцияда оқыту мен тәрбиелеуді біріктіру, болашаққа қажетті дағдыларды қалыптастыру, жасанды интеллектіні мектептерге енгізу, инклюзивті білім беруді жетілдіру және «Қазақстан балалары» стратегиясын жүзеге асыру мәселелері талқылануда.

Іс-шараға 1 500-ден астам адам қатысып, «Келешек мектептері», «Абай ұлттық мектебі», «Дарынды балалар – ел мақтанышы» секілді тақырыптық көрмелер ұйымдастырылды. Мұнда заманауи цифрлық технологиялар мен білім берудегі инновациялық шешімдер ұсынылды.

"Ұлт ұстазы Ахмет Байтұрсынов «Мектептің жаны – мұғалім» деген. Біз өркениетті ел боламыз десек, ұстаздарға барынша жағдай жасауымыз керек. Мен білім беру саласына айрықша мән беремін. 2019 жылы Президент ретінде қабылдаған алғашқы шешімдердің бірі ұстаздарға қатысты болғанын білесіздер. Қазір – білім мен ғылымның заманы. Жаһандану дәуірінде озық білімді игерген, жаңа технологияны меңгерген елдің ұпайы түгел болады. Бүгін саналы ұрпақ тәрбиелей алсақ, ертең заман көшінің басында жүреміз" - деді Қасым-Жомарт Тоқаев. 

Сонымен қатар, Президенттің айтуынша, 2019 жылдан бері білім саласының бюджеті үш есе артқан. Осы уақыт ішінде 1 миллионнан астам оқушыға арналған 1200 мектеп ашылды. «Келешек мектептері» ұлттық жобасы аясында 217 мектептің құрылысы жоспарланып, бүгінде 128-і пайдалануға берілді. Сонымен қатар, Білім беру инфрақұрылымын қолдау қорының қаржысына 60-тан астам мектеп салынды, тағы 30-ға жуығының құрылысы жалғасуда.

Мұғалім мәртебесін көтеру бағытында да маңызды қадамдар жасалды. «Педагог мәртебесі туралы» заң қабылданып, «Қазақстанның еңбек сіңірген ұстазы» атағы енгізілді. Бүгінде 74 педагог осы құрметке ие болды, ал өткен жылы 2 ұстаз «Қазақстанның Еңбек ері» атанды.

Мемлекет басшысы мұғалімдердің әлеуметтік жағдайына да назар аударды: соңғы төрт жылда олардың жалақысы екі есе өсті, 500 мыңнан астам ұстазға үстеме ақы төленеді. «Білім берудегі өзгерістердің мың көшбасшысы» жобасы аясында 332 маман мектеп директоры болып тағайындалды. Сондай-ақ, мұғалімдер артық міндеттерден босатылып, олардың басты назары бала оқыту ісіне бағытталуы тиіс екені атап өтілді.