Оқу-ағарту министрлігі оқушыларға ескерту жасады

ҚР Оқу-ағарту министрлігі мектеп оқушылары арасында қауіпсіздікке қатысты жалған ақпарат тарату фактілерінің көбейгеніне назар аударып, арнайы үндеу жариялады.

Министрлік мәліметінше, кейбір оқушылар мектеп аумағына жарылғыш зат қойылғаны туралы жалған хабар таратып, бұл әрекетті ойын ретінде қабылдап жүр. Ведомство мұндай әрекеттердің қауіпті екенін және заңмен қатаң жазаланатынын ескертті.

«Егер біреу әдейі немесе абайсызда теракт туралы жалған ақпарат таратса, бұл әрекет қылмыстық жауапкершілікке әкелуі мүмкін. Мұндай жағдайда айыппұл, қоғамдық жұмыстар немесе одан да қатаң шаралар қолданылатынын есте сақтаңыздар», – делінген министрлік хабарламасында.

Жасөспірімдер заңды жауапкершілік жасына толмаған жағдайда, оның салдары ата-аналарға жүктеледі.

Министрлік оқушыларды әрдайым ойланып әрекет етуге, қауіпсіздік мәселесін ойынға айналдырмауға шақырды.