Оқу-ағарту министрі мен облыс әкімі Көкшетаудағы БИЛ-дің жаңа ғимаратын аралап көрді
Сурет авторы: Оқу-ағарту министрлігі
Көкшетаудағы «Білім-инновация» лицей-интернатында ҚР Оқу-ағарту министрі Жұлдыз Сүлейменова мен Ақмола облысының әкімі Марат Ахметжановтың қатысуымен маңызды кездесу өтті.
Қонақтар лицейдің жаңа ғимаратын аралап, жаңадан ашылған қыздар сыныбының сабағына қатысып, оқушылармен тілдесті. Сондай-ақ жаңа жатақхана мен акт залының жұмысымен танысты.
Лицей оқушылары робототехника және жасанды интеллект технологияларын қолдану арқылы әзірлеген инновациялық жобаларын таныстырып, облыстық, республикалық және халықаралық деңгейдегі жетістіктерін көрсетті.
Жұлдыз Сүлейменова лицейдің сапалы білім мен саналы тәрбие беру ісіндегі табысын атап өтіп, ұжымға сәттілік тіледі. Ал аймақ басшысы Марат Ахметжанов оқу ордасына химия, физика және биология пәндерінің зертханалық кабинеттерін жабдықтауға арналған 74 миллион теңге көлеміндегі сертификатты табыстады.
Кездесу соңында министр мен әкім лицейдің алғашқы қыздар сыныбының оқушыларымен естелік суретке түсті.
