Мұғалімдерге мерекеге орай гүл мен сыйлық беруге бола ма? Министрлік түсініктеме берді

Елімізде 5 қазанда аталып өтетін Мұғалімдер күніне орай ұстаздарға гүл мен сыйлық беруге қатысты пікірін Оқу-ағарту министрлігінің ресми өкілі Мереке Амангелдіқызы айтты. Бұл жөнінде informburo.kz хабарлады.

Оның сөзінше, гүл сыйлау – әрдайым ризашылық пен құрметтің белгісі болып келген жақсы дәстүр.

"Ең қымбат сыйлық – көңіл мен жылы сөз. Әрбір педагог үшін оқушылар мен ата-аналардың жүрекпен жасалған ашық хаты, өлеңі, суреті немесе шын жүректен айтылған алғысы кез келген сыйлықтан артық. Осындай ықылас қана нағыз мерекелік көңіл-күй сыйлайды", – деді ол.

Министрлік мектептердегі барлық іс-шара бюджет қаражаты есебінен өтетінін, сондықтан мерекелік шараларға ақша жинауға қатаң тыйым салынатынын ескертті. Мұндай жағдайлар тіркелсе, ата-аналар білім сапасын қамтамасыз ету комитетінің аумақтық департаменттеріне хабарлауы тиіс.

"Мұғалім үшін ең үлкен сыйлық – оқушысының жетістігі, білімге ұмтылысы және ұстаз еңбегіне деген құрмет", – деп қорытындылады Мереке Амангелдіқызы.

Бұған дейін Антикор да (қазіргі – ҰҚК жанындағы Сыбайлас жемқорлыққа қарсы қызмет) мұғалімдерге гүл мен сыйлық беруге болатынын, бірақ ол үшін нақты шарт бар екенін түсіндірген еді. Егер сыйлық мұғалім тарапынан белгілі бір қызметке (мысалы, бағаны көтеру) алғышарт болса немесе 5 АЕК-тен (19 660 теңге) асатын құны бар сыйлық тапсырылса, онда ол заңсыз сыйақы ретінде қарастырылып, Қылмыстық кодекстің 247-бабы бойынша жауапкершілікке әкеп соғуы мүмкін.

Айта кетейік, Қазақстанда Мұғалімдер күні 2023 жылдан бері Дүниежүзілік мұғалімдер күнімен сәйскестендіріліп, 5 қазанда аталып өтеді. Бұған дейін мереке қазан айының алғашқы жексенбісінде тойланатын.