Мұғалімдер күні ұстаздарға гүл беруге бола ма?

Соңғы жылдары елімізде мемлекеттік қызметкерлерге сыйлық беруге шектеулер күшейді. Сыбайлас жемқорлыққа қарсы шаралар мұғалімдерді де айналып өтпеді. Бірақ мұғалімдерін қуантқысы келетін балалар аз емес, сондықтан әр жылы мұғалімдерге сыйлық беру мәселесі қозғалады. Оқу-ағарту министрлігінің ресми өкілі Мереке Амангелдіқызы осыған қатысты министрліктің ұстанымын айтты.

Ол мереке қарсаңында мұғалімдерден осындай сұрақ көп келіп жатқанын айтып өтті.

"Ұстаздар күні – расында ерекше күн, мереке педагогтердің біздің өміріміздегі маңызды рөлін тағы бір еске салады. Сондай-ақ бұл – бізді тәрбиелеу мен оқытуға бар күш-жігерін жұмсаған ұстаздарға алғыс білдірудің мүмкіндігі. Гүл сыйлау, жақсы лебіз білдіру - біздің мұғалімдерімізге білдіретін алғыс сезіміміздің белгісі. Мұндай ықылас ұстаз еңбегінің маңыздылығын көрсетіп қана қоймай, ұрпақтар арасындағы сыйластық қарым-қатынасты нығайта түседі. Айта кету керек, ұстазға құрмет көрсету ұрпақтар арасында сақталып келе жатқан дәстүр", – деп жазды ол Facebook парақшасында.

Заңға сәйкес, егер сыйлық құны 5 АЕК-тен (18 460 теңге) асса әрі мұғалім сыйлық берушінің пайдасына әрекет ететін болса, онда бұл Қылмыстық кодекстің 247-бабы бойынша қылмыстық жауапкершілікке әкеп соғуы мүмкін.

Бұған дейін Оқу-ағарту министрі Ғани Бейсембаев та мұғалімдерге гүл сыйлау үрдісіне қатысты пікір білдірген еді.