Мектептегі өзгерістер: келер жылдан бастап стоматология кабинеттері ашылып, бірыңғай ас мәзірі енгізіледі

Мектептерде келесі жылдан бастап бірқатар маңызды өзгеріс енгізілмек. Оқу-ағарту министрі Ғани Бейсембаевтың мәлімдеуінше, Денсаулық сақтау министрлігімен бірлескен жобалардың арқасында еліміздегі ірі мектептерде стоматология кабинеттері ашылады. Бұл бастама балалардың денсаулығын жақсартуға және медициналық қызметтердің қолжетімділігін арттыруға бағытталған.

Сонымен қатар мектептерде оқушылардың тамақтануын жақсарту мақсатында бірыңғай ас мәзірі енгізілмек. Министрлік өңірлерде өндірілген отандық өнімдерді пайдалана отырып, жаңа стандарттарға сай ас мәзірін дайындауды көздеп отыр. Жаңа мәзір балалардың сапалы және дұрыс тамақтануын қамтамасыз етіп, олардың оқу процесінде нәтижелілігін арттыруға ықпал етеді.

Санитарлық талаптардың сақталуын бақылау үшін мектеп асханаларында арнайы бракераждық комиссиялар жұмыс істейтін болады. Бұл комиссиялардың құрамына ата-аналар, қоғам белсенділері, мектеп әкімшілігі мен медицина қызметкерлері енеді. Олардың міндеті – мектептегі тамақтанудың сапасы мен қауіпсіздігін қамтамасыз ету.

Бұл өзгерістер балалардың денсаулығы мен қауіпсіздігін жақсартуға, білім беру процесіндегі маңызды мәселелерді шешуге бағытталған жүйелі шаралардың бір бөлігі болмақ.