Мектеп орнына тойхана: жүздеген жеке мектепте заңбұзушылықтар анықталды

Қазақстанда жүргізілген тексеріс кезінде жеке мектептердің арасында мақсатты пайдалану талаптарын бұзу және қаржы жасыру фактілері әшкереленді. Бұл туралы Премьер-министр Олжас Бектенов үкімет отырысында мәлімдеді.

17 қарашада өткен жиында білім беру саласын қаржыландыру және бақылау мәселелері қаралды. Қаржы министрі Мәди Такиев атқарылған жұмыстар туралы баяндама жасап, бірқатар сорақы деректерді ұсынды.

Министрліктің мәліметінше, елдегі 745 жеке мектептің 155-і мемлекеттік тапсырыс ала отырып, табысын жасырып келген. Кейбір мектептер тіпті нысан мақсатын бұзып, басқа қызметпен айналысқан.
Мәселен, Түркістан облысы Мақтаарал ауданындағы мектептердің бірі – тойхана ретінде, ал Шымкент қаласында – сауда орталығы ретінде тіркелген.

Сонымен қатар 64 мектепте оқушылар саны екі есе артық көрсетілген. Мысалы, Алматы облысындағы 60 оқушыға арналған жеке мектепке іс жүзінде 702 бала, ал Астанадағы 241 орындық мектепке 1003 оқушы қабылданған.

«Жекеменшік мектептерде жалған мұғалімдерді тіркеу, қосарланған қаржыландыру және бюджет қаражатын мақсатсыз пайдалану деректері анықталды», – делінген Үкіметтің баспасөз хабарламасында.

Қаржы министрлігі енді OrtaBilim атты жаңа цифрлық бақылау жүйесін енгізетінін хабарлады. Бұл сервис 2026 жылдан бастап оқушылар деректерінен бастап қаржыландыру құжаттарына дейін автоматты тексеріс жүргізіп, салаға қатаң бақылау орнатпақ.

Премьер-министр Олжас Бектенов білім саласындағы былыққа нүкте қою қажеттігін атап өтті.

«Жетер. Бұдан былай бірде-бір теңге алаяқтардың қалтасына түспеуі керек», – деді ол.