Маңғыстау облысында қарлы боран: жолдар жабылды, әуежай жұмысы тоқтады, оқушылар қашықтан оқуға ауысты

Маңғыстау облысында күн бұзылуына байланысты бірқатар шектеу енгізілді. Қатты боран мен көктайғақ салдарынан үш республикалық тасжолда қозғалыс уақытша тоқтатылды, деп хабарлады «ҚазАвтоЖол».

Жабылған жолдар:

• Бейнеу – Шетпе;
• Шетпе – Ақтау;
• Ақтау – Құрық бағыттары.

Сонымен қатар Маңғыстау ауданынан басқа барлық аудандағы мектеп оқушылары қашықтан оқу форматына ауыстырылды, деп хабарлады Lada.kz порталы.

Air Astana әуе компаниясының мәліметінше, Ақтау әуежайының ұшу-қону жолағы мұздан тазартылып жатыр. Осыған байланысты таңертеңнен бастап әуежай жұмысы уақытша тоқтатылды, ал жолаушыларға тамақ пен сусын ұсынылды. Басқа қалалардан келген жолаушылар қонақүйге орналастырылды. Әуежайдың жабылуы әуе рейстерінің кешігуіне әкелді.