Коттедж бен көлік алған: Астанада мектеп басшылығы 900 млн теңге оқу ақысын қалтаға басқан

Астанадағы №81 халықаралық мектеп – Astana English School мекемесінің бұрынғы директоры мен бас бухгалтері 900 миллион теңгеден астам қаражатты жымқырды деген күдікке ілінді. Бұл туралы Қаржылық мониторинг агенттігі хабарлады.

Агенттіктің мәліметінше, күдіктілердің бір бөлігі ата-аналардан нөлінші сыныптар мен жазғы лагерьге төлем ретінде алынған қаражатты мектеп шотына емес, жеке мақсатта жұмсаған.

«Сонымен қатар 16 миллион теңгеге жуық қаражат шын мәнінде жұмыс істемеген "өлі жандардың" атына аударылған. Олардың қатарында күдіктілердің туыстары бар, олар жалған түрде есепке алынған», – делінген ресми хабарламада.

Жымқырған қаражаттың бір бөлігіне күдіктілер жалпы құны 382 миллион теңгеге бағаланатын мүлік сатып алған: Астанадағы екі пәтер, коттедж және автокөлік. Қазіргі уақытта аталған мүлікке сот шешімімен тыйым салынды.

Күдіктілер қамауға алынған. Тергеу амалдары жалғасып жатыр.