Қазақстандықтардың көбі өзін кедей санамау үшін айына 260–320 мың теңге керек деп есептейді

Қазақстандықтардың басым бөлігі өзін кедей санамау үшін бір адамға айына кемінде 260–320 мың теңге табыс қажет деп есептейді. Мұндай пікірді Ұлттық статистика бюросы жүргізген сауалнамаға қатысқандардың 28,5 пайызы білдірген.

Зерттеу нәтижесіне сәйкес, респонденттердің 69,4 пайызы отбасының әр мүшесіне айына 260 мың теңгеден астам табыс қажет деп санайды. Оның ішінде 40,9 пайызы бұл көрсеткіш 320 мың теңгеден жоғары болуы керек деген пікірде.

Ал сауалнамаға қатысқандардың 18,4 пайызы бір адамға айына 400–500 мың теңге, тағы 7,2 пайызы 600 мың теңгеден астам табыс қажет екенін айтқан.

Осы есеп бойынша, үш адамнан тұратын отбасының ай сайынғы жиынтық табысы 780–960 мың теңге, ал төрт адамдық отбасының табысы 1,04–1,28 миллион теңге болғанда ғана өзін кедей санамайды.

Сауалнама қалалықтар мен ауыл тұрғындарының пікірінде айырмашылық бар екенін көрсетті. Қала тұрғындарының 37,3 пайызы әр адамға айына 400 мың теңгеден астам табыс қажет десе, ауыл тұрғындары арасында бұл көрсеткіш 22,5 пайызды құрады.

Сондай-ақ ерлер мен әйелдердің жауабында да айырмашылық байқалған. Әйелдердің 34,1 пайызы жеткілікті табыс ретінде 260–320 мың теңгені таңдаса, ерлердің небәрі 18 пайызы осы нұсқаны көрсеткен. Ал ер адамдар көбіне бұдан да жоғары табыс көлемін атаған.