Қазақстандық оқушылар математика мен информатикадан халықаралық олимпиадада 8 медаль жеңіп алды

Қазақстандық оқушылар Тәжікстан астанасы Душанбе қаласында өткен KhIMIO2025 халықаралық математика және информатика олимпиадасында үздік нәтиже көрсетіп, ел намысын абыроймен қорғады.

Биыл 5–9 қараша аралығында өткен білім бәйгесіне 10 елдің дарынды жастары қатысқан. Қазақстан құрамасы екі жас санатында: 14–15 жас (7–8 сынып) және 16–18 жас (9–11 сынып) аралығындағы оқушылардан құралды.

Нәтижесінде қазақстандық команда 100 пайыз нәтиже көрсетіп, ел қоржынына 8 медаль салды.

Жоғары жас санаты (9–11 сынып):

– Мансур Мамадахунов – Қызылорда облыстық «Білім-инновация» лицей-интернаты (информатика) – алтын медаль;
– Алдияр Сейтбай – Астана қаласының дарынды ер балаларға арналған «Білім-инновация» лицей-интернаты (информатика) – күміс медаль;
– Әли Еркебұланұлы – ФМБ Назарбаев Зияткерлік мектебі, Алматы (математика) – күміс медаль;
– Бердібек Орынбасар – Атырау облыстық №1 «Білім-инновация» лицей-интернаты (математика) – күміс медаль.

Кіші жас санаты (7–8 сынып):

– Ахмет Бердімұрат – Ақтөбе облыстық «Білім-инновация» мамандандырылған лицей-интернаты (математика) – күміс медаль;
– Темір Оразбек – Республикалық физика-математика мектебі, Алматы (математика) – күміс медаль;
– Азамат Рахимбердиев – Атырау облыстық №1 «Білім-инновация» лицей-интернаты (информатика) – күміс медаль;
– Ислам Ермуханов – Ақтөбе облыстық «Білім-инновация» лицей-интернаты (информатика) – қола медаль.

Олимпиаданың жұмыс тілдері – ағылшын, орыс және тәжік тілдері. Қатысушылар математика мен информатика пәндері бойынша теориялық және практикалық турларда бақ сынады.

Қазақстан құрамасының халықаралық жарысқа қатысуы Оқу-ағарту министрлігінің қолдауымен және «Дарын» республикалық ғылыми-практикалық орталығының ұйымдастыруымен жүзеге асты.