Қазақстандық оқушылар Қытайдағы халықаралық робототехника чемпионатында жеті жүлде жеңіп алды

Қазақстандағы «Келешек мектептері» мен инновациялық шығармашылық орталықтарының оқушылары Қытайдың Макао қаласында өткен FIRST LEGO League Asia Open Championship 2025 халықаралық чемпионатында табысты өнер көрсетті. Байқау 7–10 тамыз аралығында өтіп, әлемнің 30-дан астам елінен 500-ден астам команда мен 12 мыңнан аса қатысушы жиналды. Биылғы жарыстың тақырыбы «Су асты әлемін зерттеу» болды.

Үш күндік додада қазақстандық оқушылар инженерлік шеберлік, шығармашылық және командалық жұмыс бойынша жоғары нәтижеге қол жеткізіп, ел намысын абыроймен қорғады. Нәтижесінде олар 2 қола медаль мен 6 арнайы жүлде иеленді.

Қола медаль иегерлері:

• Champions Award – Leas оқу орталығының тәрбиеленушілері (Explore санаты, 6–10 жас);

• Чемпионаттың басты марапаты Champions Award – Орал қаласы Оқушылар сарайының «Subsquad» командасы (Challenge санаты, 10–16 жас).

Арнайы төрешілер жүлделері:

• Innovation Project Award – Алматы қаласындағы №97 мектептің Nova Team командасы («Келешек мектептері» аясында салынған);

• Core Values Award – Leas оқу орталығының Alliance командасы;

• Challenge Solution Award және Innovation Project Award – Түркістан облысындағы №33 мектептің AquaBots командасы;

• Core Values Award және Engineering Excellence Award – Шымкент қаласындағы №149 мектептің Yassi командасы;

• Challenge Solution Award – Қызылорда облысындағы №290 мектептің OtAi командасы;

• Team Poster Award – Алматы қаласындағы №97 мектептің Arctic Rescuers командасы;

• Team Model Award – Алматыдағы «Alem» инновациялық шығармашылық орталығының Alem Innovators командасы.

FIRST LEGO League — LEGO Education платформасы арқылы мектеп оқушыларының инженерлік және зерттеу дағдыларын дамытуға арналған халықаралық бағдарлама. Қазақстан мен Орталық Азия елдерінде оның операторы — ҚР Оқу-ағарту министрлігінің қолдауымен USTEM Foundation қоғамдық қоры.