Қазақстандық оқушылар Халықаралық химия олимпиадасында 4 медаль жеңіп алды

Қазақстандық оқушылар Біріккен Араб Әмірліктерінде өткен Халықаралық химия олимпиадасында (IChO-2025) жоғары нәтиже көрсетіп, барлығы төрт медаль еншіледі.

5–14 шілде аралығында өткен білім додасына әлемнің 93 елінен 360-тан астам оқушы қатысты. Қазақстан құрамасынан қатысқан төрт жасөспірімнің екеуі алтын, екеуі күміс медаль иеленіп, ел абыройын асқақтатты.

Жүлдегерлер:

• 🥇 Кирилл Ким, Астана қаласындағы Назарбаев зияткерлік мектебінің 12-сынып оқушысы

• 🥇 Абылай Қабдолқадыр, Астана қаласындағы Назарбаев зияткерлік мектебінің 12-сынып оқушысы

• 🥈 Еңлік Бақытбекова, Алматы қаласындағы Назарбаев зияткерлік мектебінің 12-сынып оқушысы

• 🥈 Аңсар Жақсылықов, Ақтөбе облысындағы «Білім-инновация» лицейінің 10-сынып оқушысы

Ұлттық құрамаға KAIST университетінің магистранты, халықаралық олимпиадалар жеңімпазы Санжар Бегдаир және бірнеше мәрте олимпиада жүлдегері Ринат Илюсизов жетекшілік етті.

Оқу-ағарту министрі Ғани Бейсембаев жас химиктердің жеңісі қазақстандық білім сапасының биік деңгейін тағы бір дәлелдегенін атап өтті. Министр жеңімпаздарды құттықтап, олардың жетістігі ел болашағына сенім ұялататынын жеткізді.

Айта кетейік, IChO олимпиадасы әлемдегі ең беделді пәндік олимпиадалардың бірі саналады. Президент тапсырмасына сәйкес, алтын медаль иегерлеріне – 1 500 АЕК, күміс медаль иегерлеріне – 1 000 АЕК көлемінде сыйақы беріледі. Жетекші ұстаздарға да ынталандыру төлемі қарастырылған.

Биылғы оқу жылында ұлттық құрама халықаралық және еуропалық олимпиадаларда 100% нәтиже көрсетіп отыр. Команданы дайындау ісіне «Дарын» республикалық ғылыми-практикалық орталығы жетекшілік етті.