Қазақстандық оқушы The New York Times эссе байқауында жеңіске жетті

Астана қаласындағы Назарбаев Зияткерлік мектебінің оқушысы Фариза Фазыл америкалық The New York Times басылымы ұйымдастырған Open Letter Contest халықаралық эссе байқауында 10 жеңімпаздың бірі атанды. The New York Times басылымының мәліметінше, биылғы байқауға әлемнің әр түкпірінен 10 мыңға жуық эссе келіп түскен. Жас автор байқауға ұсынған эссесінде қазақ қоғамындағы қыз балаға ат қою дәстүрі мен оның астарындағы ауыр салмақты көтеріп, терең әлеуметтік мәселені қозғаған.

Фариза эссесін «Ұлболсын» есімді қызға арнай отырып, қазақ отбасыларының ұл күту үмітімен дүниеге келген қыз балалардың ішкі жан күйзелісін, олардың есімдеріндегі «Ұл» сөзіне жасырынған жоғары үміт пен үнсіз ренішті бейнелі тілмен жеткізеді. Ол: «Сенің есімің – бұл дүниенің саған берген алғашқы сыйы еді, бірақ ол ешқашан өзіңе тиесілі болмаған» деп жазады.

Ол өз сөзінде Қызтумас, Ұлтуар, Ұлжан, Ұлболсын сынды есімдердің қоғамдағы терең тамыры мен оның балаға психологиялық әсерін сөз ете отырып, мұндай үрдіс тек Қазақстанда емес, Үндістан, Қытай секілді елдерде де кең таралғанын мысалмен көрсетеді. Оның айтуынша, әлемде миллиондаған қыз бала өмірге келмей жатып, тек жынысы үшін-ақ таңдау құқығынан айырылып жатыр.

"Айналамнан осындай есімдерге қатысты түрлі тағдырлар туралы естідім. Бауыржан Момышұлының әжесінің есімі Қызтумас болғанын да білемін. Бұл есімдер отбасындағы ұлға деген мұқтаждықтың белгісі іспетті. Егер менің есімім сондай болғанда, оны ауыстырғым келер еді. Осы ойлар мені дәл осы тақырыпты таңдауға итермеледі", – дейді Фариза Batyrjamal парақшасына берген пікірінде.