Қарағанды қыздар «Білім-Инновация» лицейі үздік 100 мектептің қатарына кірді

Қарағанды облысында ұстаздар күніне орай облыс әкімдігі мен облыстық білім басқармасының ұйымдастыруымен салтанатты жиын өтті. Шара барысында өңірдің білім беру саласында жоғары нәтиже көрсеткен педагогтер мен білім ұйымдары марапатталды.

Марапаттау рәсімінде “Қазақстанның 100 үздік мектебі” қатарына енген білім ордаларына ерекше құрмет көрсетілді. Қарағанды облысы білім басқармасының “№2 “Білім-инновация” лицей-интернаты” аталған тізімнен орын алып, Қарағанды облысы әкімінің 15 миллион теңге көлеміндегі сертификатына ие болды.

Бұл марапат — лицей-интернат ұжымының сапалы білім беруге бағытталған үздіксіз еңбегі мен жаңашылдыққа ұмтылуының айқын дәлелі. Сертификат қаражаты мектептің материалдық-техникалық базасын жаңартуға, оқу үрдісін одан әрі жетілдіруге жұмсалмақ.

Іс-шара соңы мерекелік концертпен жалғасты. Ұстаздарға арналған әндер шырқалып, шығармашылық ұжымдар өнер көрсетті.