$ 509.63 € 592.34 ₽ 6.54

ІІМ түлектер мен ата-аналарға үндеу жасады

Редакция
20 мамыр 2024, 02:40
ІІМ түлектер мен ата-аналарға үндеу жасады Сурет авторы: liter.kz

ІІМ түлектер мен олардың ата-аналарына үндеу жасады, деп хабарлайды Qrnews.kz тілшісі Polisia.kz-ке сілтеме жасап.

Ведомство 25 мамырда барлық мектепте өткізілетін салтанатты іс-шаралар барысында полиция органдары қоғамдық тәртіп пен жол қауіпсіздігін қамтамасыз ету бойынша барлық шараларды қабылдайтынын жеткізді. Патрульдік нарядтар іс-шаралар өткізілетін орындарға барынша жақын болады.Сондай-ақ Ішкі істер министрінің тапсырмасы бойынша әрбір оқу орнына жауапты полиция қызметкері бекітілді. 

"Соңғы жылдардағы тәжірибеге сүйенсек, мектептердегі “соңғы қоңыраулар” аяқталғаннан кейін ата-аналардың рұқсатымен көптеген түлектер іс-шараларды өз бетінше жалғастырады. Өкінішке қарай, жасөспірімдердің көлік тізгіндеуі қайғылы оқиғаларға әкеліп жатады. Өткен жылы мұндай фактілер Жамбыл, Атырау облыстары мен Алматы қаласында орын алды. Одан бөлек, ата-аналардың бақылауынсыз балалар тыйым салынған жерлерде суға түсіп жатады. Былтыр Ақмола, Маңғыстау және Атырау облыстарындағы су айдындарының шомылуға жабдықталмаған жерлерінде жасөспірімдердің суға кету жағдайлары тіркелді", – деді ІІМ ресми өкілі Шыңғыс Алекешев.
 
Ол осыны ескере отырып, ата-аналар мен түлектерді мінез-құлықтың қажетті нормалары мен ережелерін сақтауға шақырды. Алекешев құқық бұзушылықтар анықталған жағдайда дереу 102 арнасына, ал төтенше жағдайлар туындаған кезде 112 нөміріне хабарласу қажет екенін еске салды.

Соңғы жаңалықтар