Ғалымдар қартаюдың басты себебін анықтады

АҚШ-тың Вирджиния университетінің ғалымдары жасөспірім кездегі агрессивті мінез-құлық адамның биологиялық тұрғыдан ерте қартаюына әсер етуі мүмкін деген қорытындыға келді. Зерттеу нәтижелері Journal of Health Psychology журналында жарияланды.

17 жылға созылған бұл зерттеуге 123 адам қатысқан. Ғалымдар 1998 жылдан бастап жасөспірімдердің достарымен және ата-аналарымен қарым-қатынасын жүйелі түрде бақылап отырған. Сонымен қатар денсаулыққа қатысты биомаркерлер: холестерин деңгейі, қан қысымы, глюкоза мөлшері, ағзадағы қабыну көрсеткіштері мен қан құрамындағы өзгерістер де тіркелген.

Зерттеу авторларының айтуынша, бұл көрсеткіштер адамның өмір ұзақтығы мен жалпы денсаулығы туралы ерте болжам жасауға мүмкіндік береді.

Нәтижесінде, 13 жасында достарына агрессия көрсеткен немесе әкесімен үнемі жанжалдасқан жасөспірімдердің 30 жасқа келгенде қартаю белгілері ерте байқалғаны анықталды. Ғалымдар әсіресе жасөспірім шақтағы отбасылық қақтығыстар мен 20 жас шамасындағы достарға деген дұшпандық мінез биологиялық қартаюды жылдамдататынын атап өтті.

Бұл әсер ерлер мен әйелдерде бірдей дәрежеде байқалған.

«Бұл зерттеудің ерекшелігі – ол тек жүрек-қан тамыр аурулары қаупі туралы емес. Адамның айналасындағы адамдарға қатынасы мен олардың сізді қалай қабылдайтыны ағзаның ерте қартаюының нақты көрсеткіштерін болжай алады», – дейді зерттеу тобының өкілдері.