Елімізде балабақшаларды қаржыландыру жүйесі жаңартылды

Мектепке дейінгі білім беру сапасын арттыру және оны қолжетімді ету мақсатында балабақшаларды қаржыландыру жүйесі қайта қаралды. Жаңа өзгерістерге сәйкес, ата-аналар баласына балабақшаны өздері таңдай алады. Ал мемлекеттен бөлінетін қаржы тікелей балабақшаға емес, баланың артынан таңдалған мекемеге аударылады.

Бұл өзгеріс жекеменшік және мемлекеттік балабақшалар арасында бәсекелестікті қалыптастыруға бағытталған. Бәсекелестік арқылы балабақшалар білім беру сапасын арттырып, білікті мамандарды жұмысқа тартуға ұмтылатын болады.

Пилоттық жоба төрт қалада іске қосылды
Қазіргі таңда бұл жаңа механизм Тараз, Шымкент, Түркістан және Орал қалаларында пилоттық режимде енгізілген. Жоба сәтті жүзеге асқан жағдайда, оны ел аумағында толық масштабтау жоспарланып отыр.

Ата-аналарға арналған кеңес беру пункттері жұмыс істейді
Сондай-ақ мектепке дейінгі ұйымдарға бара алмайтын балалардың ата-аналары үшін 4,2 мыңнан астам консультациялық пункт ашылған. Бұл пункттер ата-аналарға бала тәрбиесі мен дамуына, оларды мектепке дайындауға қажетті әдістемелік көмек көрсетеді. Биылдың өзінде 328 мыңнан астам ата-ана мен балаға осындай қолдау көрсетілген.