Дарынды жастар «Болашақпен» шетелде бакалавриат деңгейінде оқи алады

Қазақстанда «Болашақ» халықаралық стипендиясының аясын кеңейту ұсынылып жатыр. Мәжілістегі Әлеуметтік-мәдени даму комитетінің төрағасы Асхат Аймағамбетовтің айтуынша, бұған дейін тек магистратура мен докторантура деңгейінде білім алу мүмкіндігі қарастырылған «Болашақ» бағдарламасына бакалавриат деңгейін қосу жоспарланып отыр.

Бұл мүмкіндік тек беделді халықаралық олимпиадалар мен ғылыми сайыстардың жеңімпаздарына, арнайы тізімге енген дарынды талапкерлерге беріледі. Асхат Аймағамбетовтың сөзінше, бұл қадам халықаралық деңгейде көзге түскен жастарды әлемнің үздік оқу орындарында оқыту арқылы олардың кәсіби дамуына қолдау көрсету үшін жасалады.

"Бұл өте қажет қадам. Өйткені, әлемдік деңгейдегі жарыстарда жеңіске жеткен оқушыларға   шетел университтеттері өз гранттарын беріп, біразі сонда қалып, осылайша біз оларды жай ғана "жоғалтып жатырмыз", – деді депутат.

«Болашақ» бағдарламасы аясында бакалавр дәрежесін шетелде алған түлектер Қазақстанға оралып, кемінде 3 жыл бойы елде жұмыс істеуге міндеттеледі.