Дәрігерлер оқушының жүктілігін байқамаған: Жоғары сынып оқушыларына гинеколог қабылдауы енгізілуі мүмкін

Қазақстанда жоғары сыныптағы қыз балаларға арналған акушер-гинеколог кеңесін мектеп медицина жүйесіне енгізу мәселесі қарастырылып жатыр. Бұл туралы Денсаулық сақтау бірінші вице-министрі Тимур Сұлтанғазиев мәлімдеді.

Бастама Ақтөбе облысында болған резонансты оқиғадан кейін көтерілді. 13 қазанда Ойыл ауданындағы орта мектептің тоғызыншы сынып оқушысы босанып, қазір ауруханада жатыр. Облыстық білім басқармасының мәліметінше, ол биыл үш рет медициналық тексеруден өткен, алайда дәрігерлер жүктіліктің белгілерін байқамаған.

Тимур Сұлтанғазиев бұл жағдайды түсіндіре отырып, мектеп скринингтерінде акушер-гинекологтың қарауы қарастырылмағанын айтты.

«Қыз бала наурыз айында скринингтен өткен, ол кезде жүктіліктің ерте кезеңі болған. Ал мектептегі жоспарлы тексерістерде акушер-гинеколог маманы болмайды. Бұл бағытты қайта қарау қажет деп есептейміз», – деді Сұлтанғазиев Мәжіліс кулуарында.

Ол министрліктің қазіргі уақытта жоғары сынып оқушыларына гинеколог қабылдауын енгізу мүмкіндігін зерттеп жатқанын атап өтті.

«Біз бұл мәселеге жүйелі тұрғыдан қарап отырмыз. Қыз балалардың репродуктивті денсаулығын қорғау – маңызды бағыт. Сондықтан акушер-гинекологтардың қабылдауын енгізу тетігін қарастырып жатырмыз», – деді вице-министр.

Денсаулық сақтау министрлігінің мәліметінше, егер ұсыныс қолдау тапса, жоғары сыныптағы қыздар жыл сайын профилактикалық гинекологиялық кеңестен өтіп отырады.

Министрлік бұл бастама нақты осы жағдаймен байланысты емес екенін, жалпы жасөспірімдер денсаулығын қорғау және ерте профилактика жүйесін жетілдіру мақсатында қарастырылып жатқанын айтып өтті.