Биыл мемлекет жекеменшік мектептерге 161 млрд теңге бөлген

Оқу-ағарту министрі Ғани Бейсембаев жеке орта білім беру ұйымдарының І республикалық конференциясында сөйлеген сөзінде мемлекет тарапынан жекеменшік білім беру ұйымдарына жан-жақты қолдау көрсетіліп жатқанын айтты. 2024 жылы жекеменшік мектептерге бюджеттен 161 млрд теңге бөлінген, бұл қаражат 250 мың баланың сапалы білім алуына арналған. Бұл туралы Оқу-ағарту министрлігі хабарлады.

Министрдің айтуынша, мемлекет жекеменшік мектептерге көмек көрсетуді жалғастырады. Тұрмысы нашар отбасылардың балаларына арнайы қолдау көрсету мақсатында заң жобасы қарастырылып жатыр. Жоба мақсаты – жекеменшік мектептердегі оқушыларға мемлекеттік білім беру қоры есебінен оқу құралдарын сатып алуға қаржылай көмек көрсету және тегін ыстық тамақпен қамтамасыз ету. Бұл қадам мемлекеттің білім сапасын арттыруға және әрбір баланың қолжетімді, қауіпсіз білім алуына басымдық беретінін айғақтайды.

Қазақстанда 8 мыңнан астам мектеп жұмыс істеп тұр, онда 3,9 миллион оқушы білім алады. Мемлекеттің қолдауының арқасында жекеменшік мектептердің саны соңғы үш жылда үш есеге артқан. Қазіргі таңда 800-ден астам жекеменшік мектепте 250 мыңнан астам бала оқиды.