БАӘ, Иран және Израиль бағытындағы рейстер тоқтатылды: Қазақстандықтарды елге қайтару жоспары талқыланды

Қазақстанның Көлік министрлігі Таяу Шығыстағы әскери қақтығыс аймағындағы әуе кеңістігі ашылған жағдайда, отандық авиакомпаниялар азаматтарды елге қайтару үшін арнайы борттар ұсынуға дайын екенін мәлімдеді.

Министрлікте өткен Жедел штаб отырысында Таяу Шығыс елдеріндегі ағымдағы жағдай, тоқтатылған рейстердің жолаушыларына қолдау көрсету шаралары және қазақстандықтарды баламалы қауіпсіз бағыттар арқылы елге қайтару жоспарлары талқыланды. Бұл бағыттағы жұмыстар ҚР Сыртқы істер министрлігімен тығыз үйлестіріле отырып жүзеге асырылмақ.

Қазіргі уақытта аймақтағы 11 мемлекетте - Иран, Израиль, БАӘ, Бахрейн, Кувейт, Иордания, Сауд Арабиясы, Катар, Оман, Ирак және Ливан елдерінде әуе кеңістігі жабық немесе жағдай тұрақсыз болып отыр. Осыған байланысты 28 ақпан мен 1 наурыз аралығында Қазақстанға бағытталған 26 рейс тоқтатылды. 2 наурызға жоспарланған 13 рейс те әзірге белгісіз күйде қалып отыр.

Жолаушыларға жедел көмек көрсету мақсатында «Қазақстанның авиациялық әкімшілігі» АҚ базасында тәулік бойы жұмыс істейтін жедел желі іске қосылды. Азаматтар төмендегі байланыс нөмірлері арқылы кеңес ала алады:

• Колл-орталық: +7 7172 77 98 21, +7 7172 79 82 13, +7 7172 79 82 14.
• Air Astana: +7 727 244 44 77, +7 7172 58 44 77.
• FlyArystan: +7 727 331 10 10.
• SCAT: +7 7252 99 88 80.
• Qazaq Air: +7 727 356 14 14.
• Астана әуежайы: +7 7172 702 999.
• Алматы әуежайы: +7 727 228 00 19.

Министрлік жолаушыларға рейс мәртебесін алдын ала нақтылап, ресми ақпарат көздеріне сүйенуді ұсынады.